Türkmen-russiýa söwda dolanyşygynyň möçberi takmynan, 1 milliard dollar, mümkinçilikler – has ýokary
Biziň ýurtlarymyzyň arasyndaky söwdanyň möçberi häzirki wagtda takmynan, bir milliard dollar derejesinde. Şübhesiz, ykdysady hyzmatdaşlygyň potensialy has ýokary. Bu barada Russiýa Federasiýasynyň premýer-ministri Mihail Mişustin 19-20-nji ýanwarda Aşgabatda geçirilýän türkmen-rus işewürlik forumynda eden çykyşynda aýtdy.
Mişustin bu çäre barada Türkmenistan bilen Russiýa Federasiýasynyň arasyndaky gatnaşyklar taryhynda ilkinji uly göwrümli işewür forumdygyny aýtdy. Russiýa tarapyndan oňa işewür toparlaryň we guramalaryň 300-den gowrak wekili gatnaşýar.
Premýer-ministriň pikiriçe, häzir diňe bir uly kynçylyklaryň däl, eýsem täze mümkinçilikleriň hem wagty. Mişustin: " Türkmenistanyň telekeçileri ýokary hilli we bäsdeşlige ukyply önümleri bilen birnäçe daşary ýurt korporasiýalarynyň Russiýa bazaryndan çykarylmagy sebäpli boşadylan käbir ýerleri eýeläp bilerler" - diýdi.
Gürrüň diňe harytlaryň akymyny köpeltmek bilen çäklenmän, eýsem bilelikdäki kärhanalary döretmek, häzirkizaman senagat, energiýa we ulag desgalaryny gurmak barada hem bolup biler.
Russiýanyň hökümetiniň başlygy sebitleýin integrasiýa formatynda hyzmatdaşlygyň geljegi, hususan-da Türkmenistanyň Ýewraziýa Ykdysady Bileleşiginde hyzmatdaşlygyň mümkinçiliklerini öwrenmegi barada aýtdy. Mişustiniň pikiriçe, Türkmenistanyň EAYB formatynda integrasiýa proseslerine gatnaşmagy ýurduň ykdysadyýetine oňyn täsir eder we "bäşligiň" ýurtlarynyň hemmesi üçin hem bähbitli bolar.
ORIENT news
