Abu-Dabiniň logistika kompaniýasy Hazardaky işlere gatnaşmagyny giňeldýär
Abu-Dabiniň AD Ports topary Gazagystan bilen Hazar deňzine degişli ylalaşyga gol çekdi. AD Ports topary Hazar deňzinde energetika kompaniýalaryna offşor we gämi gatnaw hyzmatlaryny hödürlemek üçin Gazagystanyň “KazMunaýGaz” döwlet nebitgaz kompaniýasynyň “Kazmortransflot” golçur kompaniýasy bilen bilelikdäki kärhanany döreder.
Maýa goýum mümkinçiligine garajak bilelikdäki kärhana kömekçi gämileri, toplumlaýyn offşor logistika we suwasty çözgütleri, soňraky tapgyrlarda bolsa – konteýnerli ýükleri, po-po (tekerli ulag serişdelerini daşamagy) hem-de Hazar we Gara deňizde çig nebiti daşamagy teklip eder diýlip, AD Ports toparynyň saýtyndaky metbugat-beýanatda adýylýar.
Maksat orta möhletli geljekde bilelikde bir ýylda 8-10 million tonna nebiti daşamakdan ybaratdyr.
Hazar deňziniň sebiti nebit çykarmakda dünýäde gadymy künjekleriň biridir we ählumumy energiýa önümçiliginiň barha has möhüm çeşmesine öwrülýär.
Şeýle hem Hazar ugry hut Sues kanaly hökmünde Demirgazyk-Günorta halkara ulag geçelgesiniň bir bölegi bolup durýar. Bu söwda ýoly Russiýadan Hindistana geçýär hem-de awtoulag, demirýol we deňiz ýollary özünde jemleýär.
Türkmenistan hem BAE bilen bilelikdäki ulag-logistika kompaniýasyny döretmegi ara alyp maslahatlaşýar. 2022-nji ýylyň sentýabrynda türkmen wekiliýeti Abu-Dabide Abu Dhabi Ports toparynyň baş direktory Juma Al-Şamisi bilen duşuşyk geçirdi. Portlary dolandyrmakda we olary sanlylaşdyrmakda BAE-niň öňdebaryjy tejribelerini ornaşdyrmak özara hyzmatdaşlygyň geljegi uly ugurlarynyň hatarynda görkezildi. Düzüminde Abu Dhabi Ports topary hem-de Türkmenistanyň hususy ulgamy hereket etjek Bilelikdäki kärhanany döretmek barada teklip beýan edildi.
ORIENT news
