Buenos-Aýresde 5 milliona golaý adam futbol boýunça DÇ-2022 ýeňijilerini garşylamaga çykdy
Bäş milliona golaý adam 2022-nji ýylda futbol boýunça dünýä birinjiligini gazananlary dabaraly garşylamak üçin Argentinanyň paýtagty Buenos-Aýresiň köçelerine çykdy, onda ak-gök reňklileriň milli ýygyndysy öz taryhynda üçünji gezek çempion boldy – diýip, Euronews habar berýär.
Ilatynyň 1/3-i köçä çykan şäher ulag ulgamynyň çendenaşa agram düşmegine duçar boldy: awtobusda barýan topar ýurduň esasy nyşany bolan – Ýadygärlik diňine baryp ýetip bilmedi, ulag 4 sagadyň dowamynda bary-ýogy birnäçe km ýol geçip bildi.
Polisiýa çempionlary adamlardan hyryn-dykyn dolan meýdandan çykaryp bilmedi, şeýlelikde olary dikuçar bilen alyp gitmeli boldular.
Ýygyndynyň kapitany Lionel Messi Argentinanyň mundialdaky ýeňşini Maradonna we milli ýygyndynyň geçmişdäki beýleki nesillerine, şeýle hem öz ýurdunyň halkyna bagyşlady.
ORIENT habarlar
Surat: twitter.com / @LigaAFA
