Türkmenistan serhetleriň howpsuzlygy ulgamyndaky töwekgelçilikleriň derňewi boýunça ýol kartasyny işläp düzdi
Türkmenistanda serhetleriň howpsuzlygy boýunça töwekgelçilikleriň derňewi ulgamyny institusional hukuk binýadyna girizmek boýunça ýol kartasyny işläp düzdüler – diýip, Türkmenistanyň döwlet gümrük gullugynyň saýtynda habar berilýär.
Bu baradaky maglumat Türkmenistanyň serhet, gümrük we beýleki hünär gurluşlary üçin Merkezi Aziýada serhetleriň dolandyrylyşyna goldaw bermek Maksatnamasy (BOMKA 10) tarapyndan gurnalan milli seminarynyň barşynda berildi.
Okuwyň barşynda Latwiýanyň döwlet serhet kollejiniň we Riganyň tehniki uniwersitetiniň bilermenleri döwlet edaralarynda araçäkleri ýeke-täk dolandyrmagyň ýewropa tejribesini ornaşdyrmagy hödürlediler, serhet ulgamynda howpsuzlygyň töwekgelçiligine derňew geçirmek amallary bilen tanyşdyrdylar. Gatnaşyjylar şeýle hem täze tehnologiýalary ulanyp, olary bitaraplaşdyrmak boýunça çäreleriň ulgamyny gözden geçirdiler.
Çäre BOMKA 10 Maksatnamasynyň 1-nji düzüm böleginiň çäklerinde gurnaldy. Ol Merkezi Aziýa ýurtlarynda milli we dünýä howpsuzlygyny gazanmak üçin serhet gözegçiligi edaralarynyň institusional mümkinçiligini ösdürmäge we pugtalandyrmaga gönükdirilendir.
ORIENT habarlar
Surat: customs.gov.tm
