Türkmenistanyň hususy notariuslary öz birleşmesini döretmäge mümkinçilik aldylar
Türkmenistanyň hususy notariuslary indi agzalarynyň hukuklaryny we kanuny bähbitlerini goramak üçin notariuslar birleşmesini döretmek, şeýle hem ýurdumyzda notarius işiniň ösmegine ýardam etmek hukugyna eýe boldylar.
Bu Prezidentimiz Serdar Berdimuhamedow tarapyndan tassyklanan we şu gün resmi türkmen metbugatynda çap edilen Türkmenistanyň «Notariat we notarial işi hakynda» täze kanunyndan gelip çykýar.
Täze kanuna laýyklykda notariuslar birleşmesi telekeçilik işi bolup durmaýan we hökmany agzalyga esaslanýan hünärmenlik birleşmesidir. Birleşmäni maliýeleşdirmegiň çeşmeleri Türkmenistanyň notariuslarynyň ýygnagy tarapyndan möçberleri tassyklanylýan giriş we agzalyk gatançlary bolar.
Birleşme ýurdumyzyň notariuslarynyň çözgüdiniň esasynda döredilip, Adalat ministrligi tarapyndan döwlet belligine alynmaga degişlidir. Ol Ýuridik şahslaryň ýeke-täk döwlet sanawyna girizilenden soň doly hukuk ukyplylygyna eýe bolýar.
ORIENT news
Surat: img59.ru
