Türkmenistanlylar 5-nji noýabrda köpçülikleýin bag ekişlik çärelerine gatnaşarlar
Türkmenistanda däp bolan güýzki ählihalk bag ekişlik dabarasy 5-nji noýabr, şenbe güni geçiriler. Köpçülikleýin bag ekişlik kampaniýasynyň senesi Prezident Serdar Berdimuhamedowyň ýurduň welaýat ýolbaşçylary we agrosenagat toplumy boýunça wise-premýer Annageldi Ýazmyradow bilen geçiren wideo maslahatynda yglan edildi.
Döwlet baştutany welaýat häkimlerine ýerlerdäki ekologik çäresiniň ýokary derejede guralmagyny üpjün etmegi tabşyrdy.
Köpçülikleýin bag nahallaryny oturtmak Türkmenistanda tutuş ýurt boýunça bir wagtyň özünde ýylda iki gezek - ýazda we güýzde geçirilýär. Däp bolşy ýaly, bu dabaraly çärä Prezidentiň hut özi badalga berýär.
Şeýlelik bilen, ýurtda ýylda adatça, saýaly, pürli, miweli baglaryň we üzümiň 3 million düýp nahaly oturdylýar. 2020-nji ýylda Türkmenistanyň bitaraplygynyň 25 ýyllygy mynasybetly we 2021-nji ýylda Türkmenistanyň garaşsyzlygynyň 30 ýyllygy mynasybetli degişlilikde 25 million we 30 million bag nahallary oturdylyp, bu ýagdaý kadadan çykma hasaplanýar.
ORIENT news
