Türkmenistanyň şäherlerinde çagalar meýdançalary üçin ýurtda öndürilen oýun toplumlary peýda bolar
Ýaşaýyş toplumlarynda ýerleşýän çagalar meýdançalary eýýäm adaty ýagdaýa öwrüldi. Bu täze jaýlaryň, taslamalary çagalar üçin amatly oýun meýdançalaryny döretmegi göz öňünde tutýan ýaşaýyş toplumlarynyň işjeň gurulmagy bilen baglanyşykly. Şeýle hem, ýurtda köne meýdançalary çagalaryň beden taýdan ösüşine gönükdirilen täze döwrebap meýdançalara çalyşmak maksatnamasy durmuşa geçirilýär.
– Ýurtda belli plastmassa önümlerini öndüriji «Ak Kent» kärhanasy ýakyn wagtda oýun toplumlaryny we çagalar meýdançalary üçin ýörite tematiki enjamlary öndürip başlamagy meýilleşdirýär. Tiz wagtda ýerli kompaniýanyň ýokary hilli önümleri türkmen şäherleriniň ýaşaýyş toplumlarynda peýda bolup, olar daşary ýurt analoglaryndan pes bolmaz – gurnamalar pugta, berk we göze gelüwli görnüşde öndüriler. Elbetde, bu oýun toplumynyň bahasy hem birnäçe esse arzan bolar – diýip, Senagatçylar we telekeçiler birleşmesinde habar berdiler.
“Ak Kent” zawody Türkmenistanda 2018-nji ýyldan bäri işleýär. Kärhananyň esasy ugry – suw we beýleki suwuklyklar üçin göwrümi 100 litrden 25 müň litre çenli bolan plastik gaplaryň önümçiligi, şeýle hem, öý haýwanlaryny iýmitlendirmek üçin niýetlenen ýörite gaplary öndürmekdir. Öndürilýän önümlere baglylykda, önümçilik üçin ýerli we daşary ýurt çig maly ulanylýar.
Türkmen kompaniýasynyň önüm sanawynda çagalar üçin howuzlar we awtoýollarda ulanylýan ýörite germewler hem bar.
ORIENT news
