Türkmenistan we Tatarystan bilelikdäki medeni-ynsanperwer taslamalary ara alyp maslahatlaşdylar
Türkmenistanyň Kazandaky Baş konsuly Güýç Garaýew Tatarystanyň premýer-ministriniň orunbasary Leýla Fazleýewa bilen medeni we ynsanperwer hyzmatdaşlygy ara alyp maslahatlaşdy we ikitaraplaýyn hyzmatdaşlygy ösdürmegiň möhümdigini bellediler. Bu barada Türkmenistanyň Kazandaky Baş konsullygynyň resmi saýty habar berýär.
Duşuşykda taraplar birek-birege düşünişendiklerini beýan edip, aşakdaky taslamalaryň durmuşa geçirilmegine özara gyzyklanma bildirdiler:
– üstümizdäki ýylyň 20-nji oktýabrynda geçiriljek halkara dizaýnerleriň Aşgabat dialogyna ÝUNESKO-nyň döredijilik şäherleriniň ulgamyna 2019-njy ýylda goşulan Kazan şäherinden dizaýnerleriň gatnaşmagy,
– «Galkynyş» milli at üstündäki oýunlar toparynyň Kazanyň sirkindäki çykyşyny guramak,
– 2023-nji ýylda Türkmenistanda Tatarystanyň medeniýet günlerini geçirimek,
– Türkmen eserleriniň birnäçesiniň tatar diline terjime etmek,
– Gündogaryň beýik akyldary Magtymguly Pyragynyň 300 ýyllygyna bagyşlanan çäreleri guramaçylykly geçirmek,
– Tatarystanly moda dizaýnerleriniň milli öwüşginde döwrebap usullaryny ulanmak arkaly taýýarlan türkmen lybaslary bilen tanyşdyryş çärelerini guramak,
– Kinematografiýa ulgamynda hyzmatdaşlyk, bilelikde kiçi we uly göwrümli filmleri surata düşürmek we olaryň dürli kinofestiwallara gatnaşdyrylmagyny üpjün etmek,
– Türkmen we tatar dilçi alymlarynyň özara işlerine ýardam bermek we beýl.
ORIENT news
Surat: kazan.tmconsulate.gov.tm
