Türkmenistan we BMGÖM saglygy goraýyş pudagynda 100 million dollarlyk taslamalary durmuşa geçirdiler
Türkmenistanyň hökümeti BMGÖM bilen bilelikde ýurduň saglygy goraýyş pudagynda jemi 100 million ABŞ-nyň dollaryna barabar dürli taslamalary durmuşa geçirdi.
BMGÖM-nyň Türkmenistandaky hemişelik wekiliniň orunbasary Tomisa Paowiç bu barada Aşgabatda geçirilen saglygy goraýyş boýunça halkara maslahatynyň «Türkmen diplomatiýasynyň halkara gatnaşyklarynda tutýan orny» atly bölüminiň çäklerinde eden çykyşynda gürrüň berdi. Bu barada BMGÖM-nyň Türkmenistandaky edarasynyň Instagram sosial ulgamyndaky resmi sahypasynda habar berilýär.
Şeýle hem maslahatda Durnukly ösüş maksatlaryna ýetmek boýunça meýilnamalar, hususan-da, saglygy goraýyşyň ählumumy gurşawy, ýokary hilli saglyk hyzmatlaryna, dermanlara we sanjymlara elýeterliligi öz içine alýan sagdyn durmuş ýörelgesini üpjün etmek we ähli ýaşdaky adamlaryň abadançylygyny ýokarlandyrmak meýilnamalary ara alnyp maslahatlaşyldy.
Türkmenistanyň hökümeti Dünýä gaznasynyň, Bütindünýä bankynyň, Bütindünýä saglygy goraýyş guramasynyň we beýleki ösüş boýunça hyzmatdaşlarynyň goldamagy bilen, saglygy goraýyş pudagynda Durnukly ösüş maksatlaryna ýetmeklige gönükdirilen taslamalary durmuşa geçirýär.
ORIENT news
Surat: business.com.tm
