Türkmenistan bilen Ýewropa Birleşigi wekiliýetleriň özara saparlaryny guramak baradaky meseläni ara alyp maslahatlaşdylar
Daşary işler ministrliginiň metbugat gullugynyň resmi saýtynyň habar bermegine görä, Türkmenistan bilen ÝB-niň arasyndaky hyzmatdaşlygyň häzirki ýagdaýy we geljegi hakynda Türkmenistanyň Daşary işler ministri Raşid Meredow bilen Ýewropa Birleşiginiň ilçisi Diego Ruis Alonso bilen geçirilen duşuşykda ara alnyp maslahatlaşyldy.
Taraplar ikitaraplaýyn gatnaşyklaryň, şol sanda iň ýokary derejede gepleşikleriň geçirilmeginiň möhümdigini nygtap, Ýewropa Komissiýasynyň wekiliýetleriniň we Türkmenistanyň hökümetiniň özara saparlarynyň, şeýle hem Ýewropa parlamentarileriniň türkmen kärdeşleri bilen duşuşyklarynyň guralmagynyň mümkinçiliklerini ara alyp maslahatlaşdylar.
Taraplar şeýle hem «Türkmenistan – Ýewropa Birleşigi» Bilelikdäki komitetiniň nobatdaky mejlisini geçirmek we şu ýylyň ahyryna çenli Aşgabatda adam hukuklary boýunça türkmen-ýewropa gepleşikleriniň çäginde ynsanperwerlik meseleleri boýunça duşuşyk guramak barada ylalaşdylar hem-de şunda söwda-ykdysady we medeni-ynsanperwer hyzmatdaşlygyň meselelerine möhüm ähmiýet berilýändigini bellediler.
ORIENT news
Surat: unsplash.com
