Türkmenistanyň Prezidenti daşary ýurt kompaniýalaryň ýolbaşçylary bilen duşuşdy
Ýekşenbe güni Prezident Serdar Berdimuhamedow Bouygues, Vinci Construction Grands Projets, Cifal fransuz gurluşyk kompaniýalarynyň we Dubaýyň hökümetine degişli Dragon Oil nebit kompaniýasynyň ýolbaşçylary bilen duşuşyklary geçirdi.
Türkmenistanyň Garaşsyzlyk gününiniň baýram edilmegi mynasybetli Aşgabat şäherine gelen işewürler türkmen Liderini bu möhüm sene bilen gutlamaga, duşuşyklarda hyzmatdaşlygyň geljegini ara alyp maslahatlaşmaga we täze teklipleri hödürlemäge mümkinçilik aldylar.
"Türkmenistan dürli ugurlarda ýöriteleşen öňdebaryjy daşary ýurt kompaniýalary bilen özara bähbitli hyzmatdaşlyga açykdyr, munuň üçin ýurtda amatly maýa goýum ýagdaýy we netijeli işlemek üçin şertler döredilýär" diýip, türkmen telewideniýesiniň täzelikleriniň agşamky goýberilişinde döwlet Baştutanynyň aýdan sözleri beýan edildi.
Serdar Berdimuhamedow Bouygues fransuz senagat toparynyň baş direktory Marten Buig bilen geçirilen söhbetdeşlikde bu kompaniýanyň ýurduň, onuň paýtagtynyň şähergurluşyk keşbini döretmekde goşan goşandyny belläp, mümkin bolan täze taslamalary öwrenmäge taýýardygyny aýtdy.
Öz nobatynda, Vinci Construction Grands Projetsiň baş ýerine ýetiriji direktory Patrik Kadri fransuz hyzmatdaşlaryň türkmen bazarynda uzak möhletleýin bolmagy maksat edinýädigini aýtdy. Cifal kompaniýalar toparynyň prezidenti Žil Remi bilen geçirilen söhbetdeşlikde Serdar Berdimuhamedow Türkmenistanyň gurluşykda we infrastrukturany döwrebaplaşdyrmakda, şol sanda ýangyç-energetika toplumy we kommunikasiýa ýaly pudaklarda innowasion işläp taýýarlamalary ugur edinýändigini belledi.
Dragon Oil kompaniýasynyň ýerine ýetiriji direktory Ali Raşid Al-Jarwan wekilçilik edýän nebit kompaniýasynyň “Çeleken” şertnamalaýyn çäklerde Hazar ýalpaklygyny özleşdirmekde işlerini giňeltmäge hem-de bu pudak üçin ýerli işgärleriň taýýarlanylmagyna mundan beýläk-de goldaw bermäge taýýardygyny aýtdy.
ORIENT news
