Putin çagalaryň türkmen skripkaçylar toparynyň ýolbaşçysyny Puşkin medaly bilen sylaglady
Russiýanyň Türkmenistandaky ilçisi Aleksandr Blohin “Mukam” çagalar skripkaçylar toparynyň çeper ýolbaşçysy Garold Neýmarka Puşkin medalyny gowşurdy.
Sylaglamak dabarasy Magtymguly adyndaky türkmen milli sazly-drama teatrynda Çelýabinsk oblastynyň “Ural” rus döwlet tans toparynyň konsertiniň öň ýanynda geçirildi.
“Şu gün mende RF-niň Prezidenti Wladimir Putiniň tabşyrygy bar, şol tabşyrygy uly kanagatlandyrma bilen ýerine ýetirmek isleýärin” diýip, rus ilçisi aýtdy.
Diplomat Russiýanyň hem-de Türkmenistanyň halkarynyň ýakynlaşmagyna we medeniýetleriniň özara baýlaşmagyna goşan uly goşandy üçin Maýa Kulyýewa adyndaky türkmen milli konserwatoriýasynyň ýanyndaky ýörite sazçylyk-mekdep internatynyň “Mukam” çagalar skripkaçylar toparynyň çeper ýolbaşçysy Garold Neýmarkyň Prezident Wladimir Putiniň permany bilen Puşkin medaly bilen sylaglanandygyny habar berdi.
Öz nobatynda, Neýmark her bir adamda bütin ömrüniň dowamynda ýatda galýan nähilidir bir pursatlarynyň ýa-da durmuşda şeýle döwrüniň bolýandygyny, häzir özüniň hem hut şeýle pursaty başdan geçirýändigini belledi.
“Düýn Hormatly Prezidentimiz bizi, meniň toparymy we meni – biziň ählimizi bilelikde “Altyn asyr” döwlet baýragy bilen sylaglady. Bu gün bolsa Russiýanyň Prezidenti meni medal bilen sylaglaýar. Bular – gabat gelmeleriň entegem hemmesi däl. Indi meniň gursagymda hem Magtymguly, hem Puşkin bar” diýip, sazanda nygtady.
Ol adamlaryň türkmen sazyndan lezzet alyp bilmekleri üçin “Mukam” çagalar skripkaçylar toparynyň jogap sapary bilen Çelýabinsk oblastynda bolmaklaryna umyt bildirdi.
“Men toparymyz barada şeýle alada edýändigi üçin biziň Prezidentimize, Russiýa ilçihanasyna we elbetde, meni şeýle ýokary sylag bilen sylaglan Wladimir Putine hoşallyk bildiýärin. Biziň Türkmenistan bilen Russiýa Federasiýasynyň arasyndaky dostlugyň, döredijilik dostlugynyň pugtalandyrylmagy ugrunda mundan beýläk-de işlemegi dowam etjekdigimize hem-de bu maksada ymtyljakdygymyza ynandyrýaryn” diýip, Garold Neýmark aýtdy.
ORIENT news
