Çapar goşundysynda jemagat hyzmatlarynyň, çapar çagyrmagyň tölegleri we ençeme beýlekiler
Android we iOS platformasynda telefonlar üçin Çapar goşundysy islendik adama gündelik durmuşynda gerek bolup biljek köp sanly peýdaly hyzmatlara eýedir.
Goşundynyň mazmuny çylşyrymly wezipeleriň çözülmegini awtomatlaşdyrmakda hem-de adamlara köp wagtlaryny möhüm döredijilik işlerine üns bermegine kömek etmekden ybaratdyr.
Ol bir ekrandan ykjam we öý telefonynda, internetde, IPTV-de, kabel telewideniýesinde şahsy pul hasabynyň ýagdaýyna bir wagtynyň özünde syn etmäge mümkinçilik berýär hem-de ýol polisiýasynyň jerimeleriniň bardygy barada habar berýär.
Çapar goşundysynyň üsti bilen öýden çykmazdan, suwuň we elektrik energiýasynyň ulanylandygyna töleg geçirmek bolar, şeýle hem içerki howa we demir ýol gatnawlaryna petek satyn almak mümkin. Telekeçiler üçin ygtyýarnamalary tölemek boýunça hyzmatlaryň üstünde işlenilýär.
“Türkmenpoçta” döwlet elektroaragatnaşyk kompaniýasyna degişli bolan goşundy şäher we ýurt boýunça bukjalary hem-de resminamalary ibermek üçin çapary çagyrmaga hem mümkinçilik berýär.
Goşundynyň kömegi bilen siz, şeýle hem trek-belgi boýunça iberilen zadyň barýan ýerini yzarlap bilersiňiz, şoňa görä-de, iberen goşuň ýa-da hatyň barmaly salgysyna barandygy ýa-da heniz ýoldadygy barada hemişe habarly bolarsyňyz.
“Türkmenpoçta” aragatnaşyk kompaniýasynyň hyzmatlary baradaky goşmaça maglumatlary 075 gysga telefon belgisinden bilip bilersiňiz.
ORIENT
Foto: freepik.com
