Suw alma zerarly heläkçilik çeken pakistan halkyna kömek hökmünde Aşgabatda serişdeler ýygnalar
Çäräniň guramaçylary bolan Aşgabadyň zenanlar toparynyň, paýtagtymyzyň Halkara mekdebiniň hem-de Pakistan Yslam Respublikasynyň Türkmenistandaky ilçihanasynyň wekilleri biperwaý bolmadyklaryň hemmesini “Pakistany goldalyň. Suw alma” diýen haýyr-sahawat çäresine gatnaşmaga çagyrýarlar.
Suw alma zerarly Pakistana kömek bermek boýunça Gazna üçin serişdeleriň ýygnalmagy ýekşenbe güni, 25-nji sentýabrda, Halkara mekdebiniň çäklerinde şu salgyda: Aşgabat şäheri, Berzeňňi, Ata Türk köçesi 12:00-dan 17:00-a çenli geçiriler.
Myhmanlara pakistan tagamlary, aýdym-sazlar we dynç alyş çäreleri garaşýar. Girmek üçin tölegiň bahasy 10 manat. Ýygnalan serişdeler suw almanyň ýetiren zyýanlaryny aradan aýyrmak üçin pakistan halkyna kömege ugradylar.
Türkmenistanyň Pakistana ilkinjileriň hatarynda ynsanperwer ýük ugradandygyny bellemek ýerlikli bolar. Ýük arkaly lukmançylyk enjamlary, derman serişdeleri, azyk önümleri, içimlik suw, egin-eşikler, dokma önümleri, ýyly geýim-gejimler hem-de ençeme beýleki önümler ugradyldy.
ORIENT news
