Serdar Berdimuhamedow "Türkmenistan-ŞHG" Işewürler geňeşini döretmegi teklip etdi
– Prezident Serdar Berdimuhamedow Şanhaý Hyzmatdaşlyk Guramasynyň Baş sekretary Çan Min bilen Samarkantda bolan duşuşygynda "Türkmenistan-ŞHG" Işewürler geňeşini döretmegi teklip etdi – diýip, şu gün resmi türkmen metbugaty ýazýar.
– Bu gurluş her ýyl işewürlik ýygnaklaryny, ykdysady taslamalaryň tanyşdyrylyşyny we sergileri gurar, bu bolsa Türkmenistanyň ŞHG bilen bilelikdäki konstruktiw işe taýýardygynyň tassyknamasy bolar, – diýip, türkmen lideri belleýär.
Şol bir wagtyň özünde Serdar Berdimuhamedow Türkmenistan bilen Şanhaý Hyzmatdaşlyk Guramasynyň gyzyklanma bildirýän ýurtlarynyň arasynda energetika meseleleri boýunça iş toparyny döretmegi teklip etdi.
Türkmenistanyň Prezidenti ulag pudagynda sazlaşykly we netijeli işlemek üçin wagtlaýyn Utgaşdyryjy geňeş döretmek baradaky başlangyç bilen hem çykyş etdi.
Türkmenistanyň lideri hormatly myhman hökmünde ŞHG sammitine gatnaşmak üçin Özbegistanyň Samarkant şäherine amala aşyrýan saparynyň ilkinji gününde HHR-nyň başlygy Si Szinpin, Russiýanyň Prezidenti Wladimir Putin we Özbegistanyň lideri Şawkat Mirziýoýew bilen duşuşdy.
ORIENT news
Foto: e-cis.info
