Gulf Cooperation Council we Türkmenistan hyzmatdaşlyk hakynda ähtnama gol çekdiler
Duşenbe güni, 1-nji awgustda Türkmenistana saparynyň barşynda Aýlagdaky Arap döwletleriniň hyzmatdaşlyk geňeşiniň Baş sekretary Naýef Falah Mubarak Al-Hajraf Türkmenistanyň wise-premýeri, daşary işler ministri Raşid Meredow bilen gepleşikleri geçirdi.
Duşuşykda halkara we sebit gün tertibiniň meselelerine garaldy, hyzmatdaşlyk etmegiň ugurlary hem-de umumy bähbitler ugrunda gatnaşyklary ösdürmegiň mümkinçilikleri ara alnyp maslahatlaşyldy.
Taraplar Özara düşünişmek hakynda Ähtnama gol çekdiler, ol, ilkinji nobatda, söwda-ykdysady ulgamda, energetika, suw we azyk howpsuzlygy toplumlarynda gatnaşyklary işjeňleşdirmäge gönükdirilendir.
Aýlagdaky Arap döwletleriniň hyzmatdaşlyk geňeşiniň Baş sekretary, şeýle hem ýangyç-energetika toplumyna gözegçilik edýän wise-premýer Şahym Abdrahmanow, söwda boýunça wise-premýer Batyr Atdaýew, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň baş direktory Mämmethan Çakyýew, beýleki ýolbaşçylar bilen duşuşyklary geçirdi.
Türkmenistan GCC-niň (Gulf Cooperation Council) Baş sekretarynyň Merkezi Aziýa ýurtlary boýunça saparynyň başyny başlaýar, şol saparynyň barşynda ol, şeýle hem Täjigistanda, Gyrgyzystanda, Özbegistanda we Gazagystanda bolar.
ORIENT news
