Türkmenistanyň Prezidenti ýurduň diplomatik korpusynda wezipä bellemek we boşatmak meselelerine seretdi
– Türkmenistanyň Prezidenti Serdar Berdimuhamedow ýurduň daşary döwletlerdäki diplomatik wekillerini bellemek we işden boşatmak baradaky Permanlaryň birnäçesine gol çekdi – diýip, şu gün resmi türkmen metbugaty ýazýar.
Silapberdi Nurberdiýew başga işe geçmegi sebäpli, Türkmenistanyň Awstriýa Respublikasyndaky (Wena şäheri), şol bir wagtyň özünde Wengriýadaky, Çehiýa Respublikasyndaky, Slowakiýa Respublikasyndaky Adatdan daşary we Doly ygtyýarly ilçisi, şeýle hem, Birleşen Milletler Guramasynyň Wenadaky ştab-kwartirasynda Türkmenistanyň hemişelik wekili hem-de Ýadro synaglaryny hemmetaraplaýyn gadagan etmek baradaky Şertnama Guramasynyň (Wena şäheri, Awstriýa Respublikasy) taýýarlaýyş toparynyň ýanyndaky wekili wezipelerinden boşadyldy.
Myrat Mämmetalyýew, başga işe geçmegi sebäpli, Türkmenistanyň Koreýa Respublikasyndaky (Seul şäheri) Adatdan daşary we Doly ygtyýarly ilçisi we Türkmenistanyň Singapur Respublikasyndaky Adatdan daşary we Doly ygtyýarly ilçisi wezipelerinden boşadyldy.
Atadurdy Baýramow Türkmenistanyň Ýaponiýadaky (Tokio şäheri) Adatdan daşary we Doly ygtyýarly ilçisi wezipesine bellenmegi sebäpli, Russiýa Federasiýasynyň Kazan şäherindäki Baş konsuly wezipesinden boşadyldy.
Çary Ataýew Türkmenistanyň Ukrainadaky (Kiýew şäheri) Adatdan daşary we Doly ygtyýarly ilçisi, şol bir wagtda Türkmenistanyň Moldowa Respublikasyndaky Adatdan daşary we Doly ygtyýarly ilçisi wezipesine bellenmegi sebäpli, Türkmenistanyň Belgiýa Patyşalygyndaky (Brýussel şäheri), şol bir wagtda Niderlandlar Patyşalygyndaky Adatdan daşary we Doly ygtyýarly ilçisi, Himiýa ýaraglaryny gadagan etmek baradaky guramanyň ýanyndaky Türkmenistanyň hemişelik wekili hem-de Türkmenistanyň Ýewropa Bileleşiginiň ýanyndaky wekilliginiň ýolbaşçysy wezipelerinden boşadyldy.
Gurbanmämmet Elýasow Türkmenistanyň Azerbaýjan Respublikasyndaky (Baku şäheri) Adatdan daşary we Doly ygtyýarly ilçisi wezipesine bellenmegi sebäpli, Türkmenistanyň Ýaponiýadaky (Tokio şäheri) Adatdan daşary we Doly ygtyýarly ilçisi hem-de Türkmenistanyň Filippinler Respublikasyndaky Adatdan daşary we Doly ygtyýarly ilçisi wezipelerinden boşadyldy.
Türkmenistanyň Awstriýa Respublikasyndaky (Wena şäheri) Adatdan daşary we Doly ygtyýarly ilçisi wezipesine Hemra Amannazarow bellendi.
ORIENT news
