Kerkide suw serişdelerini dolandyryş merkezi dörediler
Prezident Serdar Berdimuhamedow obasenagat toplumyna gözegçilik edýän wise-premýer Annageldi Ýazmyradowa Lebap welaýatynyň Kerki etrabynyň dolandyryş merkezinde hemişelik hereket edýän suw serişdelerini dolandyryş merkezini döretmegi tabşyrdy – diýip, şu gün resmi türkmen metbugaty ýazýar.
Kerki Türkmenistanda oba hojalygynyň zerurlyklary üçin esasy suw çeşmesi bolan Amyderýanyň günbatar kenarynda ýerleşýär. Bu şäherde suw serişdelerini dolandyryş merkeziniň döredilmegi ekerançylyk ýerleriniň suw bilen doly üpjün edilmegine we suwuň tygşytly peýdalanylmagyna şert döreder.
Türkmen lideri wise-premýere suw gorlarynyň mukdaryny göz öňünde tutup, merkeziň göçme ýygnaklaryny geçirmegi tabşyrdy. Bu ýygnaklarda kabul edilýän çözgütler ýurduň ähli welaýatlarynyň ekerançylyk ýerleriniň suw serişdeleri bilen üpjün edilmegine ýardam etmelidir.
Şeýle hem, döwlet baştutany suw infrastrukturasyny kadaly ýagdaýda saklamagyň möhümdigine ünsi çekdi we hökümete ýöriteleşdirilen gulluklar bilen birlikde, bu ugurda agrosenagat toplumynyň işini gowulandyrmak üçin teklipleri taýýarlamagy buýurdy.
ORIENT news
