Türkmenistan we Täjigistan geçiriljek hökümetara toparynyň mejlisine taýýarlyk görýärler
Söwda-ykdysady we ylmy-tehniki hyzmatdaşlyk boýunça Bilelikdäki türkmen-täjik hökümetara toparynyň XI mejlisine taýýarlyk görmek Türkmenistanyň Maliýe we ykdysadyýet ministrliginde iki ýurduň ministrlikleriniň we pudaklaýyn dolandyryş edaralarynyň wekilleriniň sanly ulgam arkaly geçirilen duşuşygynyň esasy meselesi boldy.
Çäräniň dowamynda şu ýylyň dördünji çärýeginde Aşgabatda geçirmek kararyna gelnen mejlisiň teswirnamasynyň taslamasyny taýýarlamak esasy ara alnyp maslahatlaşylan mesele boldy.
Taraplar eksport-import amallaryny geçirmegiň gurallaryny kämilleşdirmegiň, harytlaryň we hyzmatlaryň özara söwdasynyň möçberini artdyrmagyň, şeýle hem söwda-ykdysady hem-de maýa goýum hyzmatdaşlygyny has-da giňeltmek üçin şertleri gowulandyrmagyň zerurdygyny nygtadylar.
Şeýle hem ozal 2021-nji ýylyň iýulynda Duşenbe şäherinde geçirilen onunjy hökümetara mejlisiniň barşynda gazanylan ylalaşyklaryň durmuşa geçirilişiniň meselelerine garaldy.
ORIENT news
