Amerikan kompaniýalary Türkmenistanda golfy ösdürmäge isleg bildirýärler
Amerikanyň işewür toparlary golf oýnuny ösdürmekde we ýaýbaňlandyrmakda Türkmenistana goldaw bermegi, şeýle-de, umumy sport ulgamyndaky hyzmatdaşlygy berkitmegi maksat edinýär.
Bu barada Prezident Serdar Berdimuhamedowyň “Türkmenistan – ABŞ” işewürler geňeşiniň ýerine ýetiriji direktory Erik Stýuart we Nicklaus Companies kompaniýasynyň direktorlar geňeşiniň agzasy Džon Riwz bilen sişenbe güni bolan duşuşygynda gürrüň edildi – diýip, Türkmenistanyň resmi metbugaty habar berýär.
ABŞ-nyň işewür toparlarynyň wekilleri Amerikanyň sport ulgamynda ýöriteleşen kompaniýalarynyň Türkmenistanyň sportda gazanýan üstünliklerine ýokary baha berýändigini we hyzmatdaşlyk etmäge isleg bildirýändigini belläp geçdiler.
Şeýle-de, duşuşykda işewür toparlaryň, Türkmenistanyň ykdysadyýetiniň ösüşine maýa goýumlaryny goýmak arkaly, iri taslamalaryň we maksatnamalaryň durmuşa geçirilişine gatnaşmak mümkinçiligi ara alnyp maslahatlasyldy.
2017-nji ýylda Nicklaus kompaniýalar toparynyň gatnaşmagynda türkmen paýtagtynyň günorta-günbatar künjeginde Aşgabat golf-klubunyň taslamasy ýerine ýetirilipdi. “Ýyldyz” myhmanhanasynyň ýanynda yerleşen ýurduň ilkinji golf-meýdançasy 70 gektar meýdany eýeleýär.
ORIENT news
