Tähranda YHG-na agza ýurtlaryň diplomatlary Aşgabat ylalaşyklarynyň durmuşa geçirilmegine garaýarlar
Duşenbe güni, 23-nji maýda Tähranda YHG-niň sekratariýatynda YHG-ny özgertmek işi boýunça örän işjeň häsiýetli iki günlük ara alyp maslahatlaşma başlandy. Çäre agza ýurtlaryň daşary işler ministrleriniň orunbasarlarynyň derejesinde geçýär. Mejlisde Türkmenistana Wepa Hajyýew wekilçilik edýär. Şeýle hem duşuşyga Owganystandan, Azerbaýjandan, Eýrandan, Gazagystandan, Gyrgyzystandan, Pakistandan, Täjigistandan Türkiýeden we Özbegistandan wekiller gatnaşýarlar.
YHG-niň baş sekretary Husraw Noziri tarapyndan açylan ýokary derejeli duşuşyk umymy mejlisi hem-de işçi toparlaryň ikisiniň duşuşygyny özünde jemleýär.
Mejlis birnäçe anyk meselelere, aýratyn-da, pandemiýadan soňky döwürde sebit hyzmatdaşlygyny pugtalandyrmagyň ýollaryna we serişdelerine garamaga hem-de Aşgabatda gazanylan ylalaşyklaryň netijeli durmuşa geçirilmegini üpjün etmäge gönükdirilendir.
Duşuşygyň ilkinji gününde sebit söwdasynyň we özara arabaglanyşygynyň, agza ýurtlaryň arasynda ykdysady gatnaşyklary giňeltmegiň meseleleri ara alnyp maslahatlaşyldy. Bellenilişi ýaly, geçen ýyl YHG-a agza ýurtlaryň arasyndaky söwdanyň möçberi 40 milliard dollara ýakyn boldy, şoňa görä-de bu möçberi 500-600 milliard dollara çenli artdyrmak mümkinçiligi bar.
Şeýle hem taraplar agza ýurtlaryň arasyndaky üstaşyr geçirmek babatdaky işleriň giňeldilmelidigi, nyrhlaryň bolsa birmeňzeş bolmalydygy we agza döwletleriň arasynda ylalaşylmalydygy barada bir pikirde boldular.
Duşuşyk, şeýle hem Guramanyň, YHG-niň ýöriteleşdirilen edaralarynyň netijeliligini we işjeňligini artdyrmak, YHG-niň taslamalaryny maliýeleşdirmek we durmuşa geçirmek üçin utgaşdyrmagyň gurallaryny işläp taýýarlamak baradaky meselelere bagyşlanyldy.
ORIENT news
