Aşgabatda «Türkmenistanyň nebiti we gazy — 2026» atly halkara forum geçirilýär
Türkmenistanyň Söwda-senagat edarasynda «Türkmenistanyň nebiti we gazy — 2026» atly halkara maslahat we sergi öz işine başlady. «Türkmengaz», «Türkmennebit» döwlet konsernleri hem-de ýurduň Söwda-senagat edarasy tarapyndan guralan giň gerimli sergi 75 döwletden 1700-den gowrak wekiliýeti, şeýle hem dünýäniň öňdebaryjy 130-dan gowrak energetika kompaniýasyny, degişli ministrliklerini we maliýe institutlaryny bir ýere jemledi.
Foruma gatnaşyjylara hödürlenen sergi ýurdumyzyň ýangyç-energetika toplumynyň tehnologik mümkinçiliklerini giňden görkezdi. Ol gury ýerde we Hazar deňzinde geologik gözlegleri geçirmek hem-de çuň guýulary burawlamak üçin niýetlenen sanly platformalardan başlap, ekologiýa taýdan innowasion çözgütleri we emeli aňy ornaşdyrmaga çenli ugurlary öz içine aldy. Gatnaşyjylaryň aýratyn ünsüni ägirt uly «Galkynyş» gaz känini özleşdirmek, polimerleri we mineral dökünleri öndürýän gaz-himiýa toplumlarynyň kuwwatyny artdyrmak, şeýle hem köp ýyllyk strategik hyzmatdaşlar bilen gatnaşyklary pugtalandyrmak boýunça taslamalara bagyşlanan diwarlyklar çekdi. Şunda Hytaýyň CNPC we Malaýziýanyň “Petronas” kompaniýalary bilen köp ýyllaryň dowamynda alnyp barlan hyzmatdaşlygyň netijelerine aýratyn üns berildi.
Pudaklaýyn maslahatyň plenar mejlislerinde we panel ara alyp maslahatlaşmalarynda ählumumy energetika howpsuzlygy, energiýa serişdelerini ibermegiň ugurlaryny diwersifikasiýalaşdyrmak, şol sanda strategik ähmiýetli TOPH gaz geçiriji taslamasy, deňizdäki şertli bloklary özleşdirmäge maýa goýumlaryny çekmek we pes uglerodly ykdysadyýete geçmek ýaly möhüm meseleler ara alnyp maslahatlaşyldy. Maslahatyň indiki günleri üçin meýilleşdirilen maksatnamada tebigy gazdan ykdysady taýdan netijeli peýdalanmak, metanyň zyňyndylaryny azaltmak, pudagy sanlylaşdyrmak we täze nesliň ýokary hünärli hünärmenlerini taýýarlamak meselelerine aýratyn orun berilýär.
