Türkmenistanly bilermenler Jakartada ÝUNESKO-nyň seminaryna gatnaşýarlar
Türkmenistanyň wekiller Jakartada öz işine başlan ÝUNESKO-nyň «Dünýäniň hakydasy» maksatnamasynyň Halkara okuw seminaryna gatnaşýarlar. Taryhy golýazmalary we arhiw resminamalaryny gorap saklamak hem-de olary degişli sanawa hödürlemek meselelerine bagyşlanan bu forum Aziýa-Ýuwaş umman sebitinde maksatnamanyň durmuşa geçirilip başlanaly bäri geçirilen iň iri çäre boldy.
Türkmenistanyň wekiliýetiniň düzümine ÝUNESKO-nyň işleri boýunça Türkmenistanyň milli toparynyň jogapkär sekretary Çynar Rustemowa we Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň ylmy işgäri Maksat Meredow girdi. Bäş günlük seminar Indoneziýanyň Milli arhiwi tarapyndan Indoneziýanyň we ÝUNESKO-nyň işleri boýunça Koreýa Respublikasynyň milli toparlary, şeýle hem Koreýanyň Miras gullugy bilen bilelikde guraldy.
Seminaryň amaly maksatnamasy milli hünärmenleri taýýarlamaga we häzirki zaman halkara standartlaryny özleşdirmäge gönükdirilendir. Öňdebaryjy bilermenler sebitiň 16 ýurdundan gelen hünärmenlere seýrek duş gelýän kolleksiýalaryň fiziki ýagdaýyna baha bermegiň, olary saklamak bilen bagly töwekgelçilikleri dolandyrmagyň, sanly arhiwleşdirmegiň usullaryny hem-de milli golýazma kitaplaryny ÝUNESKO-nyň «Dünýäniň hakydasy» atly halkara sanawyna girizmek üçin arzalary taýýarlamagyň aýratynlyklaryny öwredýärler.
Türkmen alymlarynyň we diplomatlarynyň Indoneziýada geçirilýän foruma gatnaşmagy ýurduň golýazmalar gaznasyny sanly görnüşe geçirmek boýunça işleri işjeňleşdirmäge hem-de Türkmenistanyň baý dokumental mirasyny dünýä derejesinde wagyz etmäge mümkinçilik berer. Jakartada geçirilýän seminar 18-nji oktýabra çenli dowam eder.
