Hytaýyň we Russiýanyň daşary işler ministrleri Bakuda hyzmatdaşlyk we halkara meseleleri ara alyp maslahatlaşdy
Hytaýyň daşary işler ministri Wan I çarşenbe güni Bakuda Russiýanyň daşary işler ministri Sergeý Lawrow bilen duşuşdy.
Wan I Hytaýyň Başlygy Si Szinpin bilen Russiýanyň Prezidenti Wladimir Putiniň şu ýylyň maý we awgust aýlarynda geçiren duşuşyklarynyň Hytaý-Russiýa hemmetaraplaýyn strategik hyzmatdaşlygynyň mundan beýläk hem ösdürilmegine ýardam edendigini aýtdy.
Taraplar şeýle hem geljek aý Şençžende geçiriljek APEC ykdysady liderleriniň duşuşygyny ara alyp maslahatlaşdylar. Wan I Russiýanyň we beýleki gatnaşyjylaryň goldawynyň Aziýa-Ýuwaş umman sebitinde hyzmatdaşlygy ösdürmäge ýardam etjekdigine umyt bildirdi.
Duşuşykda Ýewraziýadaky hyzmatdaşlyga we Aziýada özara hereket we ynanyşmak çäreleri boýunça maslahatynyň işine hem üns berildi. Hytaý Russiýa we beýleki agza döwletler bilen köptaraplaýyn hyzmatdaşlygy güýçlendirmäge hem-de global dolandyryşy kämilleşdirmäge taýýardygyny aýtdy.
Lawrow Russiýa bilen Hytaýyň gatnaşyklarynyň we dürli ugurlardaky hyzmatdaşlygynyň yzygiderli ösýändigini belläp, Russiýanyň APEC liderleriniň duşuşygyny Hytaýda geçirmek baradaky goldawyny tassyklady.
Ol Russiýanyň BMG, G20, APEC we BRICS çäklerinde, şeýle hem beýleki halkara we sebit meselelerinde Hytaý bilen utgaşdyrmany mundan beýläk hem güýçlendirmegi maksat edinýändigini aýtdy.
CCTV+ habar bermegine görä, taraplar ýokary derejeli geljekki duşuşyklar hem-de özara gyzyklanma döredýän halkara we sebit meseleleri boýunça pozisiýalaryny hem utgaşdyrdylar.
