Pariž awtoulag sergisinde Hytaýyň rekord derejede köp awtoulag brendi görkezilýär
91-nji Pariž awtoulag sergisi duşenbe güni Fransiýanyň paýtagtynda açyldy. Bu ýyl sergä Hytaýyň rekord derejede köp awtoulag öndürijisi gatnaşýar we olar Ýewropa bazaryndaky ornuny giňeltmegi maksat edinýärler.
Bir hepde dowam etjek sergi Ýewropadan, Amerikadan we Aziýadan 100-den gowrak gatnaşyjyny hem-de 60-dan gowrak awtoulag öndürijisini bir ýere jemledi. Hytaý brendleriniň gatnaşmagy öňki ýyllar bilen deňeşdirilende ep-esli artdy.
Sergide BYD, XPeng, Changan, Dongfeng we Leapmotor ýaly 16 awtoulag öndürijisine degişli jemi 25 hytaý brendi görkezilýär. Bu 2024-nji ýyldaky sergi bilen deňeşdirilende takmynan iki esse köpdür.
Esasy üns elektrik ulaglaryna, gibrid modellere we täze tehnologiýalara gönükdirilýär. Hytaý kompaniýalarynyň käbiri elýeterli bahalara, beýlekileri ýokary derejeli modellere, käbirleri bolsa has çalt zarýad beriş çözgütlerine üns berýär.
Ýewropaly alyjylar üçin awtoulagyň bahasy, hyzmat we abatlaýyş çykdajylary, akkumulýatoryň mümkinçilikleri hem-de zarýad beriş tizligi esasy meseleleriň hatarynda galýar.
XPeng Ýewropada ýerli işini eýýäm giňeldýär. Kompaniýa Magna bilen hyzmatdaşlykda Awstriýada awtoulag öndürýär we Mýunhende ylmy-barlag merkezini açdy. Kompaniýanyň wekilleri tarifleriň ýa-da syýasy düzgünleriň üýtgemeginiň onuň uzak möhletli Ýewropa strategiýasyna täsir etmejekdigini belleýärler.
Sergide Citroen, Peugeot, Renault, Audi we Volkswagen ýaly iri Ýewropa brendleri hem täze modellerini görkezýärler. Elektrik ulaglary, akylly sürüjilik we täze hereketlilik çözgütleri serginiň esasy ugurlarynyň biridir.
CCTV+ habar bermegine görä, Hytaý awtoulag öndürijileriniň Pariž awtoulag sergisindäki gatnaşygynyň artmagy olaryň Ýewropa bazarynda uzak möhletli ornuny berkitmek islegini görkezýär.
