Moskwada 11 ýurduň toparlarynyň gatnaşmagynda söweşiji robotlaryň çempionaty geçirilýär
Moskwada 11 ýurtdan 144 toparyň gatnaşmagynda «Battle of Robots 2026» çempionatynyň saýlama tapgyry geçirilýär.
Bäş gün dowam etjek ýaryş Russiýanyň Sanly ösüş, aragatnaşyk we köpçülikleýin kommunikasiýalar ministrliginiň goldawy bilen guralýar. Saýlama tapgyrynyň netijeleri boýunça 36 topar ýaryşyň indiki tapgyrlaryna gatnaşmaga hukuk gazanar.
Söweşler gorag aýnasy bilen gurşalan ýapyk meýdançada geçirilýär. Uzakdan dolandyrylýan robotlar iki agram derejesinde — 110 kilograma çenli we 1,5 kilograma çenli agram derejelerinde bäsleşýärler. Garşydaş robot hatardan ýa-da ringiň çäginden çykarylan ýagdaýynda ýeňiş gazanylýar.
Gatnaşyjylaryň arasynda Hytaýyň toparlaryna aýratyn üns berilýär. Hytaýly wekiller ilkinji çempionatda ýeňiş gazanypdylar we halkara meýdançasynda iň güýçli garşydaşlaryň hatarynda galýarlar.
Gurmaçylaryň bellemegine görä, çempionatyň maksady diňe bir iň güýçli toparlary kesgitlemek bilen çäklenmän, eýsem ýaşlaryň inženerçilik, robototehnika we tehnologiýalaryň amaly ulanylyşy bilen gyzyklanmasyny ýokarlandyrmakdan hem ybaratdyr.
Ýaryşyň baýrak gaznasy 6,6 million rubla ýa-da takmynan 77 müň ABŞ dollaryna deňdir. Bäsleşikler internet arkaly hem göni ýaýlymda görkezilýär.
“CCTV+”-niň habar bermegine görä, “Battle of Robots” çempionaty kem-kemden inženerçilik tejribesini alyşmak we ýaşlaryň arasynda robototehnikany wagyz etmek üçin halkara meýdançasyna öwrülýär.
