Ukraina Russiýa we ABŞ bilen üçtaraplaýyn gepleşiklere gatnaşmaga taýýardygyny mälim etdi
Ukraina Russiýa we Amerikanyň Birleşen Ştatlary bilen üçtaraplaýyn gepleşiklere gatnaşmaga taýýardygyny mälim etdi we şeýle dialogyň oktýabr aýynda geçirilmegine umyt bildirýär. Bu barada Ukrainanyň Daşary işler ministrliginiň wekili Georgiý Tihiý habar berdi.
Kiýewde geçirilen metbugat maslahatynda onuň aýtmagyna görä, ukrain tarapy hem döwlet ýolbaşçylarynyň derejesindäki duşuşyklara, hem-de beýleki derejelerde üçtaraplaýyn geňeşmelere gatnaşmaga taýýardyr.
Georgiý Tihiýniň sözlerine görä, Ukraina halkara hyzmatdaşlary bilen bilelikde gapma-garşylykly hereketleri bes etmegiň bäş mümkin bolan görnüşine seredýär.
Olaryň arasynda gapma-garşylykly hereketleri doly we şert goýmazdan bes etmek, şeýle hem Türkiýe we Müsür bilen bilelikde işlenip düzülen Gara deňizde gämi gatnawynyň howpsuzlygyny üpjün etmek baradaky teklipler bar.
Mundan başga-da, Kiýew Hindistanyň energetika bilen baglanyşykly teklibini we Amerikanyň Birleşen Ştatlary bilen ara alnyp maslahatlaşylan energetika infrastrukturasyna zarba urmagy bes etmek baradaky teklibi öwrenýär.
“CCTV+”-niň habar bermegine görä, Ukraina gepleşikleriň dürli görnüşlerine gatnaşmaga taýýardygyny mälim edýär we gapma-garşylykly hereketleri bes etmäge, şeýle hem energetika we ulag infrastrukturasyna abanýan töwekgelçilikleri azaltmaga gönükdirilen birnäçe başlangyçlara seredýär.
