Türkmenbaşyda «Tatar gyzy – 2026» halkara bäsleşiginiň jemleýji tapgyry geçirildi
7-nji oktýabrda Türkmenbaşy şäheriniň «Ruhyýet» köşgünde tatar halkynyň taryhy mirasyny, ene dilini we däp-dessurlaryny gorap saklamaga gönükdirilen «Tatar gyzy – 2026» halkara bäsleşiginiň jemleýji tapgyry geçirildi. Adaty gözellik bäsleşiklerinden tapawutlylykda, eminler gatnaşyjylaryň intellektual we döredijilik ukyplaryna, aşpezlik ussatlygyna, däp-dessurlardan, milli aýdym-sazlardan we tanslardan habarlylygyna baha berdiler.
2026-njy ýylda bu giň gerimli baş final taryhda ilkinji gezek Türkmenistanda geçirildi. Muňa geçen ýylky bäsleşikde Türkmenistanyň wekili Alsu Rafikowanyň ýeňiş gazanmagy mümkinçilik berdi. Şeýle abraýly medeni taslamanyň Hazar deňziniň kenarynda geçirilmegi türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň we Tatarystan Respublikasynyň Baştutany Rustam Minnihanowyň arasynda gazanylan ylalaşyklaryň netijesi boldy.
Baýramçylyk maksatnamasyny Tatarystan Respublikasynyň halk artisti Alina Şaripžanowanyň we Tatarystanyň Döwlet tans toparynyň çykyşlary açdy. Jemleýji tapgyryň çäklerinde gatnaşyjylar maşgala gymmatlyklary, el hünäri we milli däp bolan aşhanalar barada wideo şekilleri hödürlediler. Köşgüň sahnasynda sungat ussatlarynyň täsirli çykyşlary, Türkmenistanyň we Tatarystanyň moda öýleriniň egin-eşik görkezilişi geçirildi. «Dehistan», «Dagdan» toparlarynyň hem-de Tatarystanyň Döwlet tans ansamblynyň bilelikde kuştdepdi tansyny ýerine ýetirmegi iki halkyň aýrylmaz dostlugynyň we medeni bitewüliginiň aýdyň nyşanyna öwrüldi.
Jemleýji tapgyra Russiýanyň sebitlerinden, Gyrgyzystandan, Türkiýeden, Türkmenistandan we Özbegistandan 12 gyz çykdy. Ähli synaglaryň netijeleri boýunça ýeňiş Özbegistandan Amina Mahmudowa degişli boldy. Bäsleşikde Tatarystana Dina Zaripowa wekilçilik etdi, resmi wekiliýete bolsa respublikanyň premýer-ministriniň orunbasary Wasyl Şaýhraziýew ýolbaşçylyk etdi. Ýeňijini resmi taýdan sylaglamak dabarasy 8-nji oktýabrda «Awaza» milli syýahatçylyk zolagynda geçiriler. Oňa Türkmenistanyň Prezidenti Serdar Berdimuhamedowyň adyndan baş baýrak — täze awtoulag gowşurylar.
