Türkmenistanly mekdep okuwçysy «Beýik siwilizasiýa» atly halkara esse bäsleşiginde 500 ABŞ dollary möçberinde baýrak gazandy
25-nji sentýabrda Eýran Yslam Respublikasynyň Türkmenistandaky Ilçihanasynyň Medeni merkezinde «Beýik siwilizasiýa» atly halkara esse bäsleşiginiň ýeňijisini sylaglamak dabarasy geçirildi. Pars dilini öwrenýän merkeziň okuwçysy Selim Annaberdiýew Eýranyň taryhy we medeniýeti barada ýazan täsirli eseri üçin üçünji orna mynasyp bolup, 500 ABŞ dollary möçberinde baýrak aldy.
Dabara Pars şygryýetiniň we edebiýatynyň gününe, şeýle hem şahyr Şahriýaryň hatyrasyna bagyşlandy. Duşuşyk okuwçylary we mugallymlary bir ýere jemledi. Halkara bäsleşigi bolsa Eýranyň Medeniýet we yslam gatnaşyklary guramasy tarapyndan geçirildi.
Ýeňijä şahadatnama we pul baýragyny Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehani hem-de medeniýet meseleleri boýunça geňeşçi Abdolreza Abbasi gowşurdylar.
Ýeňijini gutlap, Abdolreza Abbasi medeniýetiň halklary we döwletleri birleşdiriji güýç bolup hyzmat edýändigini nygtady we bu ugurda bilelikdäki taslamalaryň mundan beýläk-de üstünlikli ösdüriljekdigine umyt bildirdi.
ORIENT
