Melaniýa Tramp dünýä derejesindäki çagalar başlangyjyna tehnologiýa ägirtlerini we 57 ýurdy çekdi
ABŞ-nyň birinji hanymy Melaniýa Tramp BMG-niň Baş Assambleýasynyň 81-nji sessiýasynyň çäklerinde «Geljegi bilelikde gurýarys» atly halkara maksatnamanyň giňeldilendigini mälim etdi. Başlangyjyň esasy maksady häzirki zaman tehnologiýalaryny we elýeterli bilimi ösdürmek arkaly dünýäniň dürli künjeklerindäki ösüp gelýän nesli goldamakdan ybarat.
Koalisiýa gatnaşyjy döwletleriň sany 57-ä ýetdi. Taslama Beýik Britaniýa we Demirgazyk Irlandiýa Birleşen Patyşalygynyň, Koreýa Respublikasynyň, Filippinleriň, Polşanyň, Ukrainanyň, Türkiýäniň, Birleşen Arap Emirlikleriniň, Panamanyň, Kanadanyň we beýleki ýurtlaryň wekilleri goşuldy.
Duşuşygyň esasy wakasy Google, Amazon, Intel, Adobe, Starlink we Zoom ýaly iri tehnologiýa kompaniýalary bilen hyzmatdaşlygyň ýola goýulmagy boldy. Maslahata Apple kompaniýasynyň ýolbaşçysy Tim Kuk we PayPal kompaniýasynyň ýolbaşçysy Enrike Lores hem gatnaşdy. Hususy pudak emeli aňy bilim ulgamyna ornaşdyrmaga, sanly sowatlylygy ýokarlandyrmaga we mekdepleri aragatnaşyk bilen üpjün etmäge ýardam berer.
Tagallalary birleşdirmegiň möhümdigini nygtap, Melaniýa Tramp ýurtlaryň bilelikdäki hereketleriniň täze mümkinçilikleri açyp, syýasatyň kemala gelmegine we adamlaryň durmuşynyň has gowy tarapa üýtgemegine ýardam edip biljekdigini belledi.
Koalisiýany mundan beýläk ösdürmegiň çäklerinde 2026-njy ýyl üçin birnäçe iri halkara forumlarynyň geçirilmegi meýilleşdirilýär. Olaryň hatarynda ABŞ-da G20 ýurtlarynyň birinji hanymlarynyň duşuşygy, Filippinlerde ASEAN maslahaty, şeýle hem Polşada we Sent-Kits we Newisde sebit sammitleri bar.
Ilkinji gezek BMG-niň 80-nji sessiýasynyň çäklerinde işe girizilen «Geljegi bilelikde gurýarys» maksatnamasy çagalar üçin öňdebaryjy bilim gurşawyny döretmek maksady bilen döwletleriň birinji adamlaryny we IT pudagynyň ýolbaşçylaryny birleşdirýär.
ORIENT
