SpaceX NASA-nyň neýtron ýyldyzlaryny öwrenmek üçin täze kosmos detektoryny uçurar
NASA täze ylmy-barlag detektory bolan StarBurst-y orbita çykarmak üçin SpaceX kompaniýasynyň hyzmatlaryndan peýdalanar. Enjam älemde neýtron ýyldyzlarynyň çaknyşyp, birleşmegi netijesinde emele gelýän gysga wagtlyk gamma şöhlelenme partlamalaryny gözlemek we öwrenmek üçin niýetlenendir.
Uçuryş 2028-nji ýylda ABŞ-nyň Florida ştatyndaky Kanaweral burnunda ýerleşýän kosmodromdan meýilleşdirilýär. Detektor Falcon 9 raketasynda Bandwagon atly bilelikdäki uçuryş missiýasynyň çäginde kosmosa iberiler. Şertnama elýeterli täjirçilik uçuryşlaryny we goşmaça peýdaly ýükleri goldamaga gönükdirilen NASA-nyň ýörite VADR maksatnamasynyň çäginde baglaşyldy.
StarBurst-yň esasy wezipesi Ýer tarapyndan ýapylmadyk asmanyň ähli bölegine gije-gündiz gözegçilik etmekden ybarat. Detektor iň güýçli gamma şöhlelenme partlamalaryny hasaba alar. Alnan maglumatlary grawitasiýa güýji tolkunlarynyň hasaba alnyşy we beýleki teleskoplaryň görkezijileri bilen deňeşdirmek arkaly astronomlar Älemde bolup geçýän iň ekstremal hadysalary birbada birnäçe görnüşdäki signallaryň üsti bilen öwrenip bilerler.
Taslama Astrophysics Pioneers başlangyjynyň çäginde durmuşa geçirilýär. Bu maksatnama kiçi kosmos platformalaryny ulanmak arkaly möhüm, emma uly bolmadyk çykdajyly ylmy barlaglaryň maliýeleşdirilmegine ýardam berýär.
ORIENT
