Özbegistanda syýahatçylyk startapyna 1 milliard sum mukdaryna çenli subsidýa berler
Sentýabr 13, 2026 | 22:24 |1231
«Yuz.uz» neşiriniň habar bermegine görä, Özbegistanda syýahatçylyk pudagynda innowasiýalary döwlet tarapyndan goldamak baradaky Ministrler Kabinetiniň karary güýje girdi.
Syýahatçylar üçin täze hyzmatlary we önümleri döredýän telekeçiler işläp taýýarlamalar üçin çeken çykdajylarynyň 50%-ine çenli hasabyny yzyna alyp bilerler — subsidýanyň iň ýokary mukdary 1 milliard sum bolar. Saýlap almakda esasy ölçegler taslamanyň bazar üçin ähmiýeti we onuň özboluşlylygydyr.
Maliýeleşdirme Syýahatçylygy goldamak gaznasyndan bölünip berilýär. Ekspert topary her ýyl iň geljegi uly we peýdaly 10 sany startapy saýlap alar. Maksatnama pudagy sanlylaşdyrmaga we sebitde syýahatçylaryň täze akymlaryny çekmäge gönükdirilgendir.
ORIENT
