Windows on Arm täze derejä çykýar: Microsoft platformasyna Nvidia goşulýar
Microsoft kompaniýasy soňky bir ýylyň dowamynda Windows on Arm platformasynyň ösüşiniň netijelerini jemledi we onuň gerimini giňeltmek boýunça uly meýilnamalaryny yglan etdi.
Esasy täzelikleriň biri täze nesil enjamlarda Qualcomm Snapdragon X çiplerine goşuljak Nvidia RTX Spark prosessorlarynyň peýda bolmagydyr.
2026-njy ýylyň güýzünde Nvidia çipleriniň esasynda işleýän ilkinji Arm kompýuterleri satuwa çykarylar. Täze enjamlary Microsoft Surface, Asus, Dell, HP, Lenovo we MSI ýaly dünýäniň öňdebaryjy öndürijileri hödürlär. Bu ädim ýokary öndürijilikli hem-de energiýany tygşytly ulanýan kompýuterlere barha artýan islegi kanagatlandyrmaga gönükdirilendir.
Şol bir wagtyň özünde Microsoft programma üpjünçiliginiň utgaşyklygy bilen bagly esasy meseläni hem çözýär. Geçen ýylyň dowamynda iş, okuw, howpsuzlyk we mazmun döretmek üçin ulanylýan meşhur programmalaryň köpüsi Arm arhitekturasy üçin ýerli goldawa eýe boldy. Utgaşyklyga gözegçilik etmek üçin kompaniýa Works on WOA atly ýörite hyzmaty işe girizdi. Onuň maglumatlar binýadynda eýýäm Arm üçin uýgunlaşdyrylan 7000-den gowrak programma, şol sanda Signal, Discord we Proton Mail bar.
Entäk göni Arm wersiýasy bolmadyk programma üpjünçiligi bolsa indi täzelenen Prism emulýatory arkaly durnukly işleýär. Microsoft-yň bellemegine görä, Windows on Arm ahyrsoňy synag tapgyryndan çykyp, doly hukukly we çalt ösýän ekoulgama öwrüldi.
ORIENT
