Aşgabatda Hindistanyň garaşsyzlygynyň 80 ýyllygy dabaraly bellenildi
Şu gün, 15-nji awgustda, Hindistanyň Aşgabatdaky ilçihanasy ýurduň garaşsyzlygynyň 80 ýyllygy mynasybetli baýramçylyk çäresini gurady.
Dabara hindi diasporasynyň wekilleri, ilçihananyň işgärleri we olaryň maşgala agzalary, şeýle hem diplomatik wekilhananyň hyzmatdaşlary we dostlary gatnaşdy.
Baýramçylyk çäresi milli aýdym-saz «Wande Mataram» eseriniň bilelikde ýerine ýetirilmegi bilen başlandy. Soňra Hindistanyň Türkmenistandaky Adatdan daşary we Doly ygtyýarly ilçisi Bandaru Wilsonbabu döwlet senasy «Jana Gana Mana» ýaňlanýarka Hindistanyň Döwlet baýdagyny dabaraly ýagdaýda galdyrdy.
Diplomatik wekilhananyň ýolbaşçysy Hindistanyň Prezidenti Draupadi Murmunyň halka ýüzlenmesini okap berdi. Çykyşynda diplomat Nýu-Deliniň Türkmenistan bilen köpýyllyk dostluk we hyzmatdaşlyk gatnaşyklaryny mundan beýläk-de berkitmäge we ösdürmäge bolan ygrarlylygyny tassyklady.
Çäräniň maksatnamasyna ýoga boýunça görkezme çykyşlary we watançylyk mazmunly aýdym-saz çykyşlary girizildi. Ilçi baýramçylyk çäresiniň çäklerinde geçirilen «Hindistany tana» atly bäsleşigiň Türkmenistandan bolan iň gowy bäş gatnaşyjysyna baýraklary hut özi gowşurdy.
Şeýle hem «Wande Mataram» milli aýdymynyň 150 ýyllygyna bagyşlanan «Har Ghar Tiranga» atly ýörite sergi geçirildi. Çäre milli hindi tagamlarynyň hödürlenmegi bilen tamamlandy.
ORIENT
