Tähranda Hazar deňziniň ekologiýasy we «Awaza» Milli syýahatçylyk zolagynda geçiriljek baştutanlaryň duşuşygy ara alnyp maslahatlaşyldy
11-nji awgustda Eýran Yslam Respublikasynyň Daşky gurşawy goramak guramasynda Hazar deňziniň gününe bagyşlanan maslahat geçirildi.
Çärä Eýran Yslam Respublikasynyň wise-prezidenti, Daşky gurşawy goramak guramasynyň ýolbaşçysy Şina Ansari, Daşary işler ministrliginiň ýokary wezipeli wekilleri, Mejlisiniň deputatlary, Tähranda akkreditlenen Hazarýaka döwletleriniň ilçileri, şeýle hem Gülüstan we Gilan welaýatlarynyň häkimleri gatnaşdylar.
Duşuşygyň dowamynda gatnaşyjylar sebitiň ekologiýasyny gorap saklamak bilen bagly möhüm meseleler boýunça pikir alyşdylar. Maslahatda çykyş eden Türkmenistanyň ilçisi Hazar meselesiniň Türkmenistanyň Prezidenti Serdar Berdimuhamedowyň daşary syýasat gün tertibinde möhüm orun eýeleýändigini belledi. Türkmenistanyň sebitiň döwletleriniň arasynda dialogy ösdürmek we halkara ekologik hyzmatdaşlygy, şol sanda BMG-niň çäginde, berkitmek ugrunda yzygiderli çykyş edýändigi nygtaldy.
Maslahatda 2026-njy ýylyň 9-njy oktýabrynda «Awaza» milli syýahatçylyk zolagynda geçirilmegi meýilleşdirilýän Hazar deňziniň ekologik meselelerine bagyşlanan döwlet Baştutanlarynyň duşuşygyna aýratyn üns berildi.
Gatnaşyjylar bu sammitiň geçirilmegini ekologik howpsuzlygy üpjün etmek üçin öz wagtynda we örän möhüm başlangyç diýip atlandyrdylar. Olar «Awaza» Milli syýahatçylyk zolagynda geçiriljek duşuşygyň sebitiň tebigatyny gorap saklamak boýunça netijeli çözgütleri işläp taýýarlamak üçin möhüm meýdança boljakdygyna ynam bildirdiler we bu möhüm forumyň guramaçylygy üçin Türkmenistanyň Hökümetine minnetdarlyk bildirdiler.
ORIENT
