Türkmenistan bilen Täze Zelandiýanyň arasynda ilkinji syýasy geňeşmeler geçirildi
Türkmenistanyň Daşary işler ministrligi bilen Täze Zelandiýanyň Daşary işler we söwda ministrliginiň arasynda ilkinji ikitaraplaýyn syýasy geňeşmeler geçirildi. Diplomatik edaralaryň departament başlyklarynyň derejesindäki duşuşyk 28-nji iýulda wideoaragatnaşyk ulgamy arkaly geçdi.
Geňeşmeleriň barşynda diplomatlar Aşgabat bilen Wellingtonyň ählumumy parahatçylygy we howpsuzlygy ilerletmek meseleleri boýunça garaýyşlarynyň meňzeşligi bellenildi. Şeýle hem olar Birleşen Milletler Guramasynyň çäklerinde başlangyçlary özara goldamak tejribesini dowam etdirmäge ygrarlydyklaryny nygtadylar. Şunuň bilen baglylykda, Türkmenistanyň başlangyjy bilen kabul edilen “Energiýa serişdeleriniň ygtybarly we durnukly üstaşyr geçirilmegi hem-de onuň durnukly ösüşi we halkara hyzmatdaşlygyny üpjün etmekde orny” atly kararnamamnyň awtordaşy bolup çykyş edendigi üçin Täze Zelandiýa minnetdarlyk bildirildi.
Taraplar hyzmatdaşlygyň geljegi uly ugurlarynyň hatarynda durnukly ulag ulgamyny we energetikany ösdürmegi, daşky gurşawy goramagy hem-de «ýaşyl» tehnologiýalary ornaşdyrmagy aýratyn bellediler. Geňeşmeleriň dowamynda Birleşen Milletler Guramasynyň Durnukly ulagyň onýyllygynyň (2026-2035-nji ýyllar) çäklerinde bilelikdäki taslamalary durmuşa geçirmek, şeýle hem Türkmenistanyň ekologik başlangyçlaryny, hususan-da Aşgabatda BMG-niň Merkezi Aziýada howanyň üýtgemegi bilen bagly tehnologiýalar boýunça sebit merkezini döretmek baradaky başlangyjy ilerletmek meseleleri ara alnyp maslahatlaşyldy.
Söwda-ykdysady hyzmatdaşlyk babatda diplomatlar häzirki haryt dolanyşygynyň iki ýurduň arasyndaky bar bolan mümkinçilikleri doly açyp görkezmeýändigini bellediler. Taraplar ýokary tehnologiýalar, oba hojalygy, suw hojalygy, şeýle hem täjirçilik düzümleriniň arasynda göni hyzmatdaşlygy ösdürmegi geljegi uly ugurlaryň hatarynda görkezdiler. Mundan başga-da, taraplar medeni we bilim ulgamyndaky gatnaşyklary ösdürmek, hususan-da, ýokary okuw mekdepleriniň arasyndaky alyş-çalyş maksatnamalaryny, onlaýn festiwallary we muzeý taslamalaryny durmuşa geçirmek boýunça hyzmatdaşlygy giňeltmek barada ylalaşdylar.
