Aşgabatda türkmen-eýran hökümetara toparynyň bilelikdäki başlyklarynyň gepleşikleri geçirildi
27-nji iýulda Türkmenistanyň Daşary işler ministrliginde Ykdysady hyzmatdaşlyk boýunça türkmen-eýran hökümetara toparynyň bilelikdäki başlyklarynyň duşuşygy geçirildi. Gepleşiklere Türkmenistanyň Daşary işler ministri Raşid Meredow hem-de Eýran Yslam Respublikasynyň Ýol we şähergurluşyk ministri Farzane Sadeg Malwajerd gatnaşdy.
Duşuşygyň dowamynda taraplar ikitaraplaýyn hyzmatdaşlygyň häzirki ýagdaýyny we geljekki ösüş ugurlaryny, şeýle hem halkara guramalarynyň, ilkinji nobatda Birleşen Milletler Guramasynyň çäklerindäki özara hyzmatdaşlygy ara alyp maslahatlaşdylar. Şeýle-de gepleşiklerde iki ýurduň arasyndaky gatnaşyklaryň hoşniýetli goňşuçylyk, özara hormat goýmak we ynanyşmak ýörelgelerine esaslanýandygy aýratyn nygtaldy.
Eýran tarapy Türkmenistanyň başlangyjy bilen BMG-niň Baş Assambleýasy tarapyndan kabul edilen we Eýran Yslam Respublikasynyň hem awtordaş hökmünde çykyş eden «Halkara hukugynyň ýyly, 2028-nji ýyl» atly Kararnamanyň kabul edilmegi mynasybetli Türkmenistany gutlady.
Gepleşiklerde söwda-ykdysady hyzmatdaşlygyny ösdürmek, hökümetara toparyň işiniň netijeliligini ýokarlandyrmak meselelerine hem aýratyn üns berildi.
Duşuşygyň jemleri boýunça taraplar özara gyzyklanma bildirilýän ähli ugurlar boýunça döwletara dialogy yzygiderli ösdürmäge we hyzmatdaşlygy has-da çuňlaşdyrmaga taýýardyklaryny tassykladylar.
