Aşgabatda Türkmenistan – Özbegistan işewürlik maslahaty geçiriler
IŞEWÜRLİK | ORIENT. 27–29-njy iýul aralygynda Türkmenistanyň Söwda-senagat edarasynyň binasynda «Türkmenistan – Özbegistan» işewürlik maslahaty geçiriler. Onuň çäklerinde iki ýurduň täjirçilik we döwlet düzümleriniň wekilleriniň arasynda ikitaraplaýyn işewür duşuşyklar guralar.
B2B görnüşindäki gepleşikleriň esasy ugry gurluşyk pudagy, senagat hyzmatdaşlygy we gurluşyk materiallaryny öndürmek ýaly strategiki ugurlarda amaly hyzmatdaşlygy giňeltmäge gönükdiriler.
Üç günlük işewürlik maksatnamasynyň çäklerinde Türkmenistanyň we Özbegistanyň telekeçileriniň hem-de senagat wekilleriniň täze şertnamalara gol çekmegine, çig malyň we taýýar önümleriň göni üpjünçiligi boýunça meseleleri ara alyp maslahatlaşmagyna, şeýle-de bilelikdäki önümçilik hyzmatdaşlygy babatda taslamalary kesgitlemegine garaşylýar.
Öňümizdäki forum iki döwletiň söwda-ykdysady gatnaşyklaryny täze derejä çykarmak ugrunda alyp barýan syýasatyny görkezýär. ORIENT neşiri mundan ozal sebitde önümçilik kuwwatlaryny birleşdirmäge güýçli itergi bermäge gönükdirilen türkmen-özbek Senagat zolagyny we Ýokary derejeli döwletara geňeşi döretmek baradaky möhüm teklipler barada habar beripdi.
