Raşid Meredow bilen Sergeý Lawrow telefon arkaly söhbetdeşlikde ynsanperwer taslamalary we güýzdäki sammiti ara alyp maslahatlaşdylar
AŞGABAT, 20-nji iýul | ORIENT. Türkmenistanyň Daşary işler ministri Raşid Meredow Russiýa Federasiýasynyň Daşary işler ministri Sergeý Lawrow bilen telefon arkaly söhbetdeşlik geçirdi. Söhbetdeşlik rus tarapyň başlangyjy bilen geçirildi diýip, Türkmenistanyň daşary syýasat edarasynyň metbugat gullugy habar berýär.
Ministrlikleriň ýolbaşçylary ikitaraplaýyn gün tertibiniň esasy meselelerini giňişleýin ara alyp maslahatlaşdylar we ynsanperwer hyzmatdaşlygyň ösdürilmegine aýratyn üns berdiler. Hususan-da, taraplar bilim we medeniýet ulgamlarynda bilelikdäki taslamalary çaltlandyrmaga özara gyzyklanma bildirýändiklerini tassykladylar.
Gepleşikleriň aýratyn ugurlarynyň biri hem öňde boljak halkara duşuşyklaryna görülýän taýýarlyk boldy. Ministrlikleriň ýolbaşçylary 2026-njy ýylyň oktýabr aýynda Türkmenistanda geçiriljek ýokary we iň ýokary derejedäki köptaraplaýyn çärelere taýýarlyk meseleleri boýunça pikir alyşdylar hem-de özara utgaşykly hereket etmegiň ugurlaryny ara alyp maslahatlaşdylar.
