Awazada Hazar ekologiýa sammiti geçiriler
AŞGABAT, 20-nji iýul | ORIENT. «Awaza» milli syýahatçylyk zolagy 2026-njy ýylyň oktýabr aýynda geçiriljek Hazar ekologiýa sammitini kabul etmäge taýýarlyk görýär. Bilermenler we diplomatlar sebitiň ekoulgamyny bilelikde goramagyň esasy ugurlaryny kesgitlejek resminamalar toplumyny ylalaşmak işlerine eýýämden girişdiler.
Ýokary derejedäki duşuşyga görülýän taýýarlyk Türkmenistanyň Hazar deňziniň meseleleri boýunça pudagara toparynyň mejlisinde ara alnyp maslahatlaşyldy. Öňde boljak sammit ýurduň halkara ekologiýa başlangyçlaryny ilerletmek we daşky gurşawy goramak ulgamynda ählumumy institutlar bilen hyzmatdaşlygy giňeltmek üçin möhüm meýdança bolar. Şol bir wagtyň özünde Hazar deňziniň güni mynasybetli geçiriljek çärelere hem taýýarlyk görülýär.
Ekologik forum Hazar deňziniň kenarynda geçiriljek giň gerimli güýzki çäreleriň iň möhüm bölekleriniň biri bolar. Belläp geçsek, oktýabr aýynda Awazada Merkezi Aziýa döwletleriniň we Azerbaýjan Respublikasynyň döwlet Baştutanlarynyň konsultatiw duşuşygy, GDA-nyň döwlet Baştutanlary Geňeşiniň mejlisi, suw serişdeleri boýunça ministrler derejesindäki geňeşmeler hem-de Halkara zenanlar dialogy ýaly ýokary derejeli birnäçe çäre geçiriler.
