Intel kosmos üçin radiasiýa durnukly Starfire prosessorlaryny hödürledi
Intel kompaniýasy tehnologik taýdan möhüm ädim ädip, açyk kosmos şertlerinde işlemek üçin niýetlenen Starfire prosessorlaryny tanyşdyrdy.
Adaty ýer ýüzüniň prosessorlary Ýeriň atmosferasynyň daşyndaky güýçli radiasiýa sebäpli çalt hatardan çykyp bilýär. Täze Starfire platformasy bu meseläni çözýär we emeli hemralar hem-de kosmos zondlary üçin ýokary ygtybarlylygy üpjün edýär.
Täze prosessorlaryň esasy artykmaçlygy olaryň örän çydamlylygydyr. Olar –55 °C-den +125 °C-e çenli bolan aşa sowuk we yssy temperaturada durnukly işlemäge ukyplydyr.
Inženerleriň esasy gazanan üstünlikleriniň biri hem kosmos radiasiýasyndan gorag ulgamydyr. Bu ulgam mikroshemalaryň zaýalanmagynyň we näsazlyklaryň öňüni alýar. Intel platformanyň 10 ýyldan gowrak ygtybarly hyzmat etjekdigini belleýär. Bu aýratynlyk örän möhümdir, sebäbi kosmosa uçurylan enjamlardaky prosessory çalyşmak mümkin däl.
Ýokary gorag derejesine garamazdan, täze çipler häzirki zaman şahsy kompýuterleriniň derejesindäki hasaplaýyş kuwwatyna eýedir. Şeýle hem olar bortda maglumatlary dessine gaýtadan işlemäge mümkinçilik berýän emeli aň mümkinçilikleri bilen enjamlaşdyrylandyr. Munuň netijesinde emeli hemralar uly möçberdäki maglumatlary seljermek üçin Ýere ibermegiň ýerine, olary gönüden-göni kosmosda işläp bilerler.
ORIENT
