Moskwa «Dutaryň owazlary» atly X halkara festiwalynyň çäklerinde ylmy maslahaty kabul eder
ORIENT | Medeniýet. 2026-njy ýylyň 26-njy oktýabrynda Moskwadaky Russiýa Döwlet kitaphanasynyň taryhy Paşkow öýünde «Sungat halklaryň medeni hyzmatdaşlygynda» atly halkara ylmy-amaly maslahaty geçiriler. Bu ähmiýetli forum meşhur türkmen kompozitory Nury Halmämedow adyndaky «Dutaryň owazlary» atly X Moskwa halkara sungat festiwalynyň çäklerinde guralýar. On ýyl bäri geçirilip gelinýän bu iri taslama Russiýanyň, Türkmenistanyň we GDA ýurtlarynyň akademiki hem-de milli medeni däplerini ýakynlaşdyrýan möhüm medeni köpri bolup hyzmat edýär.
Ylym-bilim meýdançasy Maýa Kulyýewa adyndaky Türkmen milli konserwatoriýasy bilen bilelikde, Russiýa Federasiýasynyň Medeniýet ministrliginiň we Milli medeniýeti hem-de sungaty ösdürmek gaznasynyň goldawy bilen guralýar.
Soňky ýyllarda festiwal alymlary, diplomatlary we sazandalary bir ýere jemleýän abraýly bilermenler meýdançasyna öwrüldi. Öňki maslahatlarda Beýik Ýüpek ýolunyň Ýewraziýa medeniýetine täsiri, sungatdaky innowasiýalar, şeýle hem beýik türkmen şahyry we akyldary Magtymguly Pyragynyň döredijilik mirasy ýaly möhüm temalar ara alnyp maslahatlaşyldy.
Dürli ýyllarda geçirilen ylmy maslahatlaşmalara Türkmenistanyň Russiýadaky Adatdan daşary we Doly ygtyýarly ilçisi Esen Aýdogdyýew, Russiýa Döwlet kitaphanasynyň baş direktory Wadim Duda, festiwalyň çeper ýolbaşçysy, kompozitor Mämed Guseýnow, şeýle hem iki ýurduň iri döredijilik ýokary okuw mekdepleriniň professorlary we alymlary gatnaşdylar.
Şu ýylyň oktýabr aýynda geçiriljek maslahatyň esasy üns merkezi 2026-njy ýylyň ýubileýi bellenilýän görnükli kompozitorlaryň döredijilik mirasyny öwrenmäge gönükdiriler. Guramaçylyk topary türkmen akademiki saz sungatynyň ussatlary Rejep Allaýarow, Weli Muhadow, Çary Nurymow, Baýramdurdy Hudaýnazarow, şeýle hem dünýä saz sungatynyň beýik wekilleri Sergeý Prokofýew, Dmitriý Şostakowiç we Nikolaý Mýaskowskiý baradaky ylmy işleri kabul eder.
Maslahatda etnomedeni däpleri gorap saklamak, milli gymmatlyklary sanly döwürde ýaş nesillere ýetirmek we häzirki zaman festiwal hereketleriniň jemgyýetçilik-medeni ähmiýeti ýaly meseleler hem ara alnyp maslahatlaşylar.
Forumyň ylmy geňeşine Türkmen milli konserwatoriýasynyň dosenti Ýelena Osipowa, dirižýor we mugallym Ýewgeniý Wolkow, medeniýeti öwreniji hem-de mugallym Tatýana Solodkowa ýolbaşçylyk eder. Maslahata sungat işgärleri, mugallymlar, doktorantlar we talyplar gatnaşmaga çagyrylýar.
Guramaçylar çykyşlar üçin ýüzbe-ýüz, onlaýn hem-de wideo stend görnüşlerini göz öňünde tutýarlar. Maslahatyň materiallar ýygyndysynda (Russiýanyň Ylmy sitirleme indeksinde — RINS-de hasaba alynýan neşirde) makalasyny çap etdirmek isleýän awtorlaryň arzalary 2026-njy ýylyň 1-nji awgustyna çenli kabul edilýär. Beýleki gatnaşyjylar bolsa 1-nji sentýabra çenli hasaba alnyp bilner.
Resminamalar «Dutaryň owazlary» atly X Moskwa halkara sungat festiwalynyň Guramaçylyk toparynyň elektron salgysyna iberilmelidir: festival.sounds-of-dutar@mail.ru
