Aşgabatda türkmen-ýapon syýasy geňeşmeleri geçirildi
Türkmenistanyň Daşary işler ministrliginde 3-nji iýulda iki ýurduň daşary syýasat edaralarynyň arasynda türkmen-ýapon syýasy geňeşmeleriniň nobatdaky tapgyry geçirildi. Türkmen wekiliýetine Daşary işler ministriniň orunbasary Mähri Bäşimowa, ýapon wekiliýetine bolsa Ýaponiýanyň Daşary işler ministrliginiň Merkezi Aziýa meseleleri boýunça Ýörite wekili Işikawa Masaki ýolbaşçylyk etdi.
Diplomatlar ikitaraplaýyn we sebitleýin hyzmatdaşlygynyň esasy ugurlaryny jikme-jik ara alyp maslahatlaşdylar. Bu hyzmatdaşlygyň berk binýady bolsa döwlet Baştutanlarynyň derejesindäki yzygiderli syýasy dialoga esaslanýar.
Söwda-ykdysady hyzmatdaşlyk ugrunda taraplar bilelikdäki maýa goýum taslamalarynyň durmuşa geçirilişini seljerdiler. Gazhimiýa senagaty (döwrebap ýokary tehnologiýaly toplumlaryň gurluşygy), energetika pudagy (infrastrukturalary döwrebaplaşdyrmak) hem-de ulag-logistika ulgamy (Ýewraziýa yklymyndaky üstaşyr ugurlary özara utgaşdyrmak) Aşgabat bilen Tokio üçin däp bolan ösüş ugurlary bolmagynda galýar.
Türkmenistanyň we Ýaponiýanyň ykdysady hyzmatdaşlyk boýunça Türkmen-Ýapon we Ýapon-Türkmen toparlarynyň utgaşdyryjy ornuna aýratyn üns çekildi. Bu toparlar täze şertnamalaryň baglaşylmagyny we tehnologiýalaryň alyş-çalşygyny öňe ilerletmekde esasy herekete getiriji güýç hökmünde çykyş edýär.
Duşuşyga gatnaşyjylar durnukly ösüşi üpjün etmek maksady bilen, ilkinji nobatda Birleşen Milletler Guramasy ýaly abraýly halkara guramalaryň meýdançalarynda hereketleri utgaşdyrmaga taýýardyklaryny tassykladylar. Şeýle hem “Merkezi Aziýa + Ýaponiýa” dialogynyň çägindäki amaly hyzmatdaşlyga aýratyn üns berildi.
Ynsanperwer gatnaşyklar babatda taraplar akademiki alyş-çalyşlary dowam etdirmäge, bilelikdäki ylmy-barlag işleri ösdürmäge hem-de Türkmenistanyň bilim edaralarynda ýapon dilini öwrenmek boýunça maksatnamalara mundan beýläk-de goldaw bermäge taýýardyklaryny beýan etdiler.
