Özbegistanlylar daşary ýurt walýutasyny banklara has köp satyp başladylar
Ýylyň başyndan bäri Özbegistanyň raýatlary banklara 10 milliard ABŞ dollaryndan gowrak möçberde daşary ýurt walýutasyny satdylar. Şol bir wagtyň özünde, ýuridiki we fiziki şahslaryň daşary ýurt walýutasyna bolan umumy islegi 25 milliard dollardan geçdi diýip, Özbegistanyň Merkezi bankynyň metbugat gullugy habar berýär.
Berlen maglumatlara görä, umumy islegiň möçberi 2025-nji ýylyň degişli döwri bilen deňeşdirilende 20,1% ýokarlandy. Bu mukdaryň 20,2 milliard dollary ýuridiki şahslar tarapyndan satyn alnan walýuta, 5,5 milliard dollary bolsa fiziki şahslaryň satyn alan walýutasydyr.
Şeýle hem ýuridiki we fiziki şahslar tarapyndan hödürlenen daşary ýurt walýutasynyň umumy möçberi hem takmynan 5 milliard dollar artdy.
Bu görkeziji geçen ýylyň degişli döwri bilen deňeşdirilende 28,6% ýokarlanyp, 22,3 milliard dollara ýetdi. Düzgünleşdirijiniň maglumatlaryna görä, ýylyň ilkinji bäş aýynda ilat täjirçilik banklaryna 10,2 milliard dollar, ýuridiki şahslar bolsa 12,1 milliard dollar möçberinde walýuta satdy.
Şeýle-de hasabat döwründe milli walýutanyň hümmeti ABŞ-nyň bir dollary üçin 11 938–12 320 som aralygynda üýtgäp durdy we ýylyň başy bilen deňeşdirilende diýen ýaly üýtgemedi. Şol bir wagtyň özünde, walýuta hümmetiniň ortaça üýtgewsizligi (wolatilligi) 30 som ýa-da 0,25% derejesinde boldy.
