Saratow Döwlet Uniwersitetiniň aspiranty Nepesmyrat Gylyjow «GDA-nyň iň gowy talyby» diýlip ykrar edildi
Saratow Döwlet Uniwersitetiniň (SDU) biologiýa fakultetiniň türkmenistanly aspiranty Nepesmyrat Gylyjow abraýly halkara «GDA-nyň iň gowy talyby» bäsleşiginiň ýeňijisi boldy. Ýaş alym giň gerimli ýaşlar taslamasynda güýçli bäsdeşlerinden öňe geçmegi başardy.
Bäsleşik «Parasat» Milli Bilim we Innowasiýalar Merkezi hem-de «Täze Gazagystan» innowasion merkezi tarapyndan guraldy. Taslamanyň esasy maksady Garaşsyz Döwletler Arkalaşygyna agza ýurtlardan zehinli, başlangyçly we liderlik ukybyna eýe bolan talyplary ýüze çykarmak, goldamak hem-de höweslendirmekden ybaratdyr. 2026-njy ýylda taslama iki müňden gowrak ýaşlar gatnaşdy. Olar ylym, sungat, sport we jemgyýetçilik işi ýaly dürli ugurlar boýunça bäsleşdiler.
Nepesmyrat Gylyjowyň gazanan ýeňşi onuň köpýyllyk netijeli zähmetiniň kanuny netijesi boldy. Ol mundan ozal SDU-nyň bakalawr we magistr derejelerini tapawutly gutarypdy. 2024-nji ýylda bolsa Russiýanyň abraýly baýragynyň sebit tapgyrynda «Ýylyň daşary ýurtly talyby» diýen ada mynasyp bolupdy.
Häzirki wagtda ýaş alym ylmy iş bilen işjeň meşgullanýar, birnäçe ýöriteleşdirilen makalalaryň awtorydyr. Şeýle-de ol türkmen talyplary üçin neşir edilen üç okuw gollanmasynyň bilelikdäki awtory bolup çykyş etdi. Mundan başga-da, ol aspiranturadaky okuwyny mekdepde biologiýa mugallymy bolup işlemegi bilen üstünlikli utgaşdyrýar. Onuň okuwçylary eýýäm sebit olimpiadalarynda baýrakly orunlary eýeleýärler.
ORIENT
