Gazagystanyň ilkinji AI uniwersiteti şu tomusdan başlap talyplary kabul eder
Gazagystanda şu tomus täze ylmy-barlag uniwersiteti bolan QAIRU (Qazaq AI Research University) resminamalary kabul edip başlar. Bu ýokary okuw mekdebi ýurtda emeli aň (AI) boýunça hünärmenleri taýýarlamaga doly gönükdirilen ilkinji uniwersitet bolar.
Uniwersitetde okuwlar diňe iňlis dilinde alnyp barylar. Kabul ediş möwsümi 2026-njy ýylyň 20-nji iýunynda başlar.
Gazagystanyň köpçülikleýin habar beriş serişdeleriniň maglumatlaryna görä, ilkinji okuw ýylynda bakalawr maksatnamalaryna 400 talyp, magistratura bolsa 100 talyp kabul etmek meýilleşdirilýär. Bakalawr derejesine girmek üçin dalaşgärler matematika we informatika dersleri boýunça Bitewi milli synagyň (UNT) netijelerini hödürlemeli bolarlar.
Tölegli esasda bilim almak üçin iň pes geçiş baly 70 bolar. Bilim grantlary boýunça bäsleşige gatnaşmak üçin bolsa azyndan 90 bal toplamak zerurdyr.
Iňlis dilini bilmek derejesine aýratyn üns berilýär. Dalaşgärler halkara dil şahadatnamalarynyň birini hödürlemeli: IELTS boýunça azyndan 5.0 bal, TOEFL ITP boýunça 460 bal ýa-da TOEFL iBT boýunça 65 bal. Halkara şahadatnamasy bolmadyk dalaşgärler üçin içerki dil söhbetdeşligi göz öňünde tutulýar.
QAIRU taslamasynyň alem.ai platformasynyň esasynda 2026-njy ýylyň güýzünde işe girizilmegine garaşylýar.
