Mongoliýa «Orta geçelge» boýunça Türkmenistan bilen hyzmatdaşlyga gyzyklanma bildirýär
Türkmenistan, Mongoliýa we Täjigistanyň arasynda ulag-logistika hyzmatdaşlygyny giňeltmek meseleleri Ulan-Batorda geçirilen duşuşykda ara alnyp maslahatlaşyldy. Duşuşyga Türkmenistanyň Demir ýol ulaglary ministriniň orunbasary Hezretguly Çaryýew hem-de üç ýurduň ulag edaralarynyň wekilleri gatnaşdylar.
Gepleşikleriň dowamynda taraplar demir ýol ulaglary ulgamynda hyzmatdaşlygy işjeň ösdürmäge taýýardyklaryny tassykladylar. Şeýle hem gatnaşyjylar raýat awiasiýasy, demir ýol we awtoulag daşamalary ugurlarynda hyzmatdaşlygy giňeltmegiň, şeýle-de Ýewraziýa sebitiniň ýurtlaryny baglanyşdyrjak täze ulag akymlaryny döretmegiň mümkinçiliklerini ara alyp maslahatlaşdylar.
Ministr Borhuugiýn Delgersaýhanyň belleýşi ýaly, Mongoliýa Merkezi Aziýa ýurtlary bilen ulag aragatnaşyklaryny giňeltmegi öz syýasatynyň strategik ugurlarynyň biri hökmünde görýär.
“Ulag ulgamyndaky hyzmatdaşlyk ýurtlarymyzyň arasynda ykdysadyýetiň, söwdanyň we önümçiligiň ösüşine ýardam berýän möhüm faktor bolup durýar. Şonuň üçin Mongoliýa täze ulag geçelgelerini ösdürmäge hem-de Merkezi Aziýa we Gündogar Ýewropa ýurtlary bilen gatnaşyklary berkitmäge uly ähmiýet berýär” diýip, ministr nygtady.
Taraplar ulag we logistika ulgamyndaky hyzmatdaşlygyň soňky ýyllarda Mongoliýanyň Merkezi Aziýa ýurtlary bilen syýasy we ykdysady gatnaşyklaryny giňeltmegiň esasy ugurlarynyň birine öwrülendigini bellediler.
Duşuşykda Türkmenistanyň «Orta geçelge» taslamasynyň çäklerindäki hyzmatdaşlygyna aýratyn üns berildi. Mongoliýa bu ugur boýunça hyzmatdaşlygy ösdürmäge gyzyklanma bildirip, şol geçelge arkaly geçýän halkara ulag ugurlary bilen bagly meseleleri ara alyp maslahatlaşdy.
Mundan başga-da, ministr Mongoliýanyň we Täjigistanyň howa hem-de awtoulag ulaglary ulgamynda hyzmatdaşlygy giňeltmek meýilleriniň bardygyny aýtdy. Ýakyn wagtda taraplar howa gatnawlary hakynda şertnama gol çekmegi meýilleşdirýärler.
Şeýle hem Mongoliýanyň Demir ýollar müdirliginiň başlygy B. Arturyň 11–12-nji iýunda Duşenbede geçiriljek Demir ýollar hyzmatdaşlygy guramasynyň Ministrler geňeşiniň 53-nji mejlisine gatnaşjakdygy habar berildi.
