Moskwada Türkmenistanyň Medeniýet günleri tamamlandy
Moskwada Türkmenistanyň Russiýa Federasiýasyndaky Medeniýet günleri üstünlikli tamamlandy. Medeni çärä Türkmenistanyň medeniýet işgärleri, sungat ussatlary, şol sanda meşhur artistler, opera ýerine ýetirijileri, estrada aýdymçylary, belli aýdym-saz we tans toparlary, şeýle hem köpçülikleýin habar beriş serişdeleriniň wekilleri gatnaşdylar.
Hormatly myhmanlaryň hatarynda Russiýa Federasiýasynyň Daşary işler ministrliginiň wekilleri, iki ýurduň işewür guramalarynyň agzalary, medeniýet edaralarynyň jogapkär ýolbaşçylary, daşary ýurt diplomatlary, jemgyýetçilik guramalarynyň ýolbaşçylary, alymlar, artistler, žurnalistler, talyplar we türkmen diasporasynyň wekilleri boldy.
Medeni çäräniň çäklerinde Maýa Kulyýewa adyndaky Türkmen milli konserwatoriýasynyň hem-de P.I. Çaýkowskiý adyndaky Moskwa döwlet konserwatoriýasynyň rektorlarynyň duşuşygy geçirildi. Duşuşygyň dowamynda medeniýet we sungat ulgamynda tejribe alyşmak, şeýle hem okuw işiniň dürli ugurlary boýunça hyzmatdaşlygy ösdürmek meseleleri ara alnyp maslahatlaşyldy.
Şeýle hem Moskwadaky M.I. Rudomino adyndaky Bütinrussiýa döwlet daşary ýurt edebiýaty kitaphanasynda iki ýurduň ýazyjylarynyň döredijilik duşuşygy geçirildi. Duşuşykda tejribe alyşmak we kitaphana işi babatda hyzmatdaşlygy işjeňleşdirmek meseleleri ara alnyp maslahatlaşyldy.
