Xiaomi kämilleşdirilen emeli aňly eplenýän smart-planşeti taýýarlaýar
Xiaomi kompaniýasy ekrany ulaldylan täze eplenýän smartfony taslamalaşdyrmaga başlady. Bu enjam hem smartfonyň, hem-de planşetiň ornuny doly çalşyp biljek görnüşde döredilýär. Täze model geljekki iPhone Ultra flagmanyna, şeýle hem Samsung we Apple kompaniýalarynyň meňzeş enjamlaryna gönüden-göni bäsdeş hökmünde taýýarlanýar.
Ultra giň ekranly eplenýän enjamlara bolan gyzyklanma dünýä boýunça ep-esli artdy. Bu ýagdaý tehnologiýa ägirtlerini täze konstruktiw çözgütleri gözlemäge mejbur edýär. Xiaomi alyjylary diňe bir çeýe ekran bilen däl, eýsem emeli aňyň özboluşly mümkinçilikleri bilen hem özüne çekmegi meýilleşdirýär.
Smartfonyň esasy aýratynlygy emeli aň gurallary bilen enjamlaşdyrylan täzelenen gapdal paneli bolar. Ol ulanyja zerur funksiýalary dessine işe girizmäge we gündelik işleri köpugurly iş tertibinde ýerine ýetirmäge mümkinçilik berer. Şeýlelikde, ulanyjy programmalaryň arasynda geçiş etmezden birnäçe işi bir wagtda ýerine ýetirip biler.
Xiaomi tarapyndan resmi tanyşdyrylyş heniz geçirilmedik hem bolsa, bilermenler kompaniýanyň öňki eplenýän flagmany bolan Xiaomi Mix Fold 4 modeliniň üstünligini pugtalandyrmaga çalyşjakdygyna ynanýarlar. Kämilleşdirilen emeli aňly täze giň formatly modeliň bazara çykmagy premium smartfonlar bazaryndaky güýçleriň deňagramlylygyna düýpli täsir edip biler.
ORIENT
