Çagalar konsert-tejribesi janly sungatyň sanly dünýäden üstün çykandygyny görkezdi
Aşgabatda ýakynda geçirilen «Çagalarymyz internetde» atly gyzykly we biraz hem degişme öwüşginli tomaşa nesilleriň arasyndaky hemişelik jedelden ylham aldy. Konsertiň guramaçylary Ýekaterina Darçiýa bilen Ýelena Arakelýan tomaşaçylary diňe nusgawy çykyşlar bilen gyzyklandyrmak bilen çäklenmän, janly sungat bilen sanly tehnologiýalaryň garşylygyny sahnadaky täsirli bäsleşige öwürdiler.
Tomaşa garaşylmadyk we çuň manyly «Bildirişler tansy» bilen başlandy. Smartfonlaryň ýagty ekranlaryna ýapyşyp oturan ýaş artistler «sanlylaşdyrylan» keşpleri ussatlyk bilen janlandyrdylar. Sazly bezeg bolsa gajetleriň ýadawsyz seslerini – gelýän habarlaryň jyňňyrdysyndan başlap, klawiatura düwmeleriniň şakyrdysyna çenli takyk gaýtalady. Bu sahna häzirki döwrüň çagalarynyň wagtynda oflaýn durmuş bilen sazlaşmasa, nähili ýagdaýa düşüp biljekdigini degişme görnüşde görkezdi.
Wirtual dünýäniň «ýesirleri» sahnadan çykandan soň, agşamyň alyp baryjysy we ylham berijisi Ýekaterina Darçiýa tomaşaçylary mähirli garşylap, maşgalalara duşuşygyň esasy maksadynyň janly we duýguly aragatnaşygyň şatlygyny paýlaşmakdygyny ýatlatdy. Reňkli öwüşginli tomaşanyň maksatnamasy dürli many-mazmunlardan düzülen täsirli mozaikany ýatladýardy. Agşamyň iň özüne çekiji pursatlarynyň biri sazly remeýkler boldy.
Meşhur «Çunga-Çanga» aýdymynyň sözleri internetde çäksiz gezmegiň howplaryna laýyklykda täzeden işlenip, täze öwüşgin bilen ýerine ýetirildi. «Bremen sazandalary» multfilminiň tokaý talaňçylary bolsa ene-atalaryň parollaryny ele geçirmek isleýän mekir hakerlere öwrüldiler. Tomaşaçylaryň tehniki ösüşe bolan ynamyny dikeltmek üçin sahna «Fiksikler» keşplerindäki çagalar çykyp, tehnikanyň hakyky dostlaryň ornuny tutmak üçin däl-de, adama kömek etmek üçin döredilendigini ýatlatdylar.
Agşamyň depgini her çykyş bilen ýokarlanyp, wirtual hakykata gyzykly alternatiwa hödürledi. Allaberdi Ataýewiň ýolbaşçylygyndaky «Sunja» lezginka tans mekdebiniň tansçylary joşgunly kawkaz sazlarynyň astynda zaly joşduryp, halk tansynyň gysga wideolary yzly-yzyna görmekden has köp üns we güýç talap edýändigini subut etdiler.
Tans çykyşyndan soň kompozitor Aýna Şirowanyň meşhur «Tüýdük» aýdymy ýaňlandy. Bu eser üçin awtoryň özi tarapyndan ýörite jaz orkestri üçin aýratyn aranžirowka taýýarlanyldy. Abraýly «Ýaş zehin» döwlet bäsleşiginiň ýeňijisi Tylla Şirowanyň fortepianoda ýerine ýetiren ussat improwizasiýasy sungata düşünýän tomaşaçylarda aýratyn täsir galdyrdy.
Maksatnamanyň jemleýji bölüminde «Saýrak bilbiller» çagalar horunyň (ýolbaşçysy Gülälek Baýrammyradowa) sazly goldawynda tomaşaçylar «Ösüş nirelere ýetdi» we «Çagalyk planetasy» aýdymlaryny bilelikde aýtdylar. Şol pursatda geçirilen tejribäniň üstünlikli bolandygy äşgär boldy. Janly saz we sahnadaky çyn ýürekden görkezilen ussatlyk sosial torlardan ynamly üstün çykdy. Tomaşa gutarandan soň ulularam, çagalaram görenlerini gyzgalaňly ara alyp maslahatlaşýardylar. Iň gyzykly tarapy bolsa, köpüsi smartfonlaryny diňe öýe gitmek üçin taksi çagyrmak maksady bilen ýatlady.
Aýna Ýolbarsowa
